Da ka jingioh lum ia ka jingtip kaba bniah ki pulit ka Ri Bhoi ki la ioh ban kem ia ki 3 ngut ki suba ba dei dkhot HNLC bad la kynnoh ruh ba ki don ka jingthmu ban pynbthei bom IED ha Rilum Khasi-Jaintia.
Kine ki 3 ngut kiba la shah kam ha ki Pulit ka Ri Bhoi, ki kynthup ia u Equest Langsiang (31), Deiborlangki Sariang (31), bad u Markhlan Biam (34), ha kaba ia u Langsiang la ioh kem najan Bethany Hospital Nongpoh bad ia u Sariang bad u Biam la ioh kem na Nartiang bad Laskein ha West Jaintia Hills.
Katkum ka kyrwoh ba la phah da u Superintendent of Police ka Ri Bhoi, u Jagpal Singh Dhanoa, la ong ba ha ka jingbuddien ki la ioh ia ka jingtip kaba bniah bha, ba u Equest Langsiang la suba ba u dei u dkhot ka HNLC bad u la don ruh ka jingthmu ban pynbthei bom IED ha kylleng ki jaka jong ka Rilum Khasi Jaintia ryngkat bad kitei ki ar ngut ba la ioh kem.
U la iathuh ruh bai a u Langsiang la ioh ban kem najan Bethany hospital Nongpoh ha ka 20 tarirk u Nailar 2024 ha ka por 12.30 AM bad ka jingioh kem la lap ruh ia ki sakhi lyngba ka jingioh kuru pia ka Mobile phone jong u. la ujor mokotduma ruh ha Nongpoh Police Station katkum ka case NO. 87(08)2024 U/s 113 (3) (5) jong ka BNS.
La ong ruh ba ha ka jingtohkit, u Langsiang u la phla ba u dei u dkhot ka HNLC bad u la don ka jingthmu ruh ban pynbthei bom IED ryngkat u Sariang bad u Biam, ba ki Pulit ki la ioh ban kem na West Jaintia Hills.
Shuh shuh, une u heh Pulit ha ka kyrwoh, u la pynpaw ba kitei ki 3 ngut ki la kam ba ki dei ki dkhot ka HNLC bad ki la don ruh ka jingthmu ban pynbthei bom IED ha ka 14 bad 15 tarik u Nailar 2024, kaba dei katkum ka jingbthah ki dkhot nongialam ka HNLC na Bangladesh. Na ka liang ki Pulit ka Ri Bhoi ki la dang pynlong ia ka jingtohkit kaba bniah ban lap ksai ruh ia kiwei ki dkhot kiba don bynta halor kane ka jingthmu ban pynbthei bom IED ha Rilum Khasi-Jaintia, ong ka kyrwoh khubor na une u heh Pulit ka Ri Bhoi.
