Ka Seng Hynniewtrep National Movement (HNM) Western Ri-Bhoi mynta ka sngi ka la pynsgew syndon sha u ka shkor u MLA ka Jirang Constituency u Bah Sosthenes Sohtun, ha kaba kum u MLA ka thain u dei ban kren halor ki mat ki jura kiba dei shaphang ka jingdonkam ki paidbah ha Jirang Constituency.
Haba kren sha ki lad pathai khubor, u President ka HANM Western Ri Bhoi, u Bah Sumarlang Lyngdoh, u la ong ba kum ka seng ka shim ia kane ka kabu ba kyrpad ia u MLA ka Jirang ban kren ha kane ka Dorbar Synrai kaba la sdang mynta ka sngi, ka dei halor ka Nongrim ba dang don shibun ki jingduna kiba don hapoh ka Jirang Constituency.
Ki katto katne ki mat ba ka seng ka angnud ba u MLA ka Jirang un kren ha kane ka Dorbar Synrai, ki kynthup ia ka surok a Belahari sha rajakhomai, ka jingdawa ban buh noh ia ka Border Police Outpost ha Balakhwa, ban pyntreikam thikna ia ka Civil Sub Division Patharkhmah, ban plie paidbah noh ia ka Model Degree College ha Patharkhmah bad kynthup ban kren halor ki skhim kyrpang na ka bynta ki shnong khappud hapoh ka Jirang Constituency.
Ha kawei ka bynta, na ka liang une u nongnialam ka HANM Western Ri Bhoi u samla Sumarlang Lyngdoh u la kyrpad ruh naduh u myntri rangbah ka jylla u Conrad K. Sangma bad kiwei ki myntri sorkar ban kren halor ka jingkren pyrshah u myntri rangbah ka Assam u Himanta Biswa Sarma pyrshah ia ka skulbah USTM bad katei ka jingkynthoh jong u ia katei ka skulbah ka la ktah ia ka jingmut jingpyrkhat ki samla pule.
