Ki nongrep kiba ju im jakpoh da kaba ri ia u khniang ryndia na ka Kyllonmathei ha ka thaiñ Shallang jong ka West Khasi Hills kila ïakynduh jingeh bad mad ia jingsngewsih kaba khraw, kaba dei hadien ba u kynja khniang ba phylla u la wan ban lynshop bad bam duh ruh ia ki jingthung kiba ki ju bsa bam ha kaba ri ia u Niangryndia.
Na ka liang ki nongri khniang ryndia ki la iathuh ba kane ka jingwan lynshop ne hiar thma kine ki kynja khniang ba phylla ka la long ka jingduhnong kaba khraw, namar kitei ki khniang ki bam lut ia ki sla jong ka dieng ryndia bad ruh ki sla jong u dieng phan kya ha katei ka thain.
Shuh shuh, ki la pynpaw ba kane ka jingwan lyngshop jong u tei u khñiang ym ba ki wan lyngshop tang ha ka wei ka lyngkha hynrei ki wan ban hiar thma ban bam ia ki sla lajan baroh ki lyngkha kiba don marjan. Namarkata, na ka liang kine ki nongrep nongrep ki la kyrpad sha ka sorkar bad sha ka tnad ba dei peit ba ki dei ban wan jurip bad ruh ban thaw ki lad ki lynti ban kner jingiarap na ka bynta kito ki nongrep ba shah ktah.
