Ki riewieid phutbol bad kiba kwah ban leit sakhi ia ka jingiakhun Semi-final hapdeng ka Shillong Lajong Football Club pyrshah ia ka Northeast United Football Club, ki la pynpaw ia ka jingsngew diaw, namar ba ki la kulmar ban ïoh ia ki tiket ban leit sakhi ia ka semi-final ka Durand Cup ka ban long ha JN Stadium Polo ha ka 26 tarik mynta u bnai.
Kumba ka long mynta, ka jingdie ia ki tiket ka dei beit tang ha ki katto katne ki jaka ha Nongbah Shillong, hynrei na kaba la sakhi bad iohlum jingtip, la ong ba ka jingiaknieh ban ïoh ia ki tiket, ka la dei kaba shyrkhei eh.
Ha manla ki jaka ba la die ia ki tiket, ka jingdon ki briew kiba leit ienglain ban ïoh tiket, ka la dei kaba palat eh bad la sawa hoi kiw hoi kiw ha ka por ba ienglain ban ïoh tiket.
Kiba la kham pynpaw ia ka jingsngew diaw ka dei ia ki briew na kiwei ki Distrik, kum na Ri Bhoi, Jowai bad West Khasi Hills, namar ki don shibun kiba kwah ban leit sakhi, hynrei kim ïoh tiket shuh na ka daw ka jingiaknieh ticket ban ioh ban leit sakhi ia katei ka Semi Final ban ia khun pyrshah hapdeng ka Shillong Lajong bad ka Northeast United Football Club.
