Haba kren sha ki lad pathai khubor ha ka sngi sdang ka Dorbar synrai, U Chief Minister barim ka jylla bad uba dei ruh u nongialam ka TMC, u Dr. Mukul Sangma u la ong ba ka jingmih ki 3 ngut ki MLA ka congress ban leit pyniasoh sha ka NPP, ka dei na ka daw ba ka don ka jingiashrut hapoh party kaba la pynlong ia ki 3 ngut ki MLA Congress ban leit ban pyniasoh sha ka NPP party.
Kum ban pynkynmaw, ki 3 ngut ki MLA ka Congress kiba la leit ban pyniasoh sha ka NPP party ki kynthup ia u MLA ka Umsning u Dr. Celestine Lyngdoh, u MLA ka Mawhati u Bah Charles Marngar bad u MLA Ka Nongstoin u Bah Gabriel Wahlang.
Halor kane ka jinglong jingman ka sain pyrkhat jong ka kam sain hima sima ha ka jylla, u Dr. Mukul Sangma u la ong ba kino kino ki party ki dei ban sngewthuh kumno ban pynbit pynbiang ia la ki MLA bad ban don ka jingiasngewthuh jingmut khnang ba kum kane ka jingmih ne leit pyniasoh sha kiwei ki party kan nym jia kaba lah ruh ban ktah ia ka jylla bad ia ki paidbah.
Haba phai sha ka jingphet seng jong u bad ki 12 ngut na ki Congress MLA kiba la pyniasoh sha ka TMC, u la ong ba ka dei ka jingangnud ne ka jingioh mynsiem ban ioh noh da kawei ka rynsan ha ka kam sain hima sima ban ia kaba shu kwah bo tang ha shwa ka election. U la kynthoh ruh ba ki 3 ngut ki MLA ka Congress ki la leit ban pyniasoh sha ka NPP ka dei ka jingkular jingmut ban don bynta lang ha ka party ba don ha ka bor bad kaba lah ruh ban ai jingmyntoi ia ki halor ka rai kaba ki shim ban pyniasoh sha kawei pat ka party.
Haba kren katkum ki lynti jong ka ain, u Dr. Sangma u la kdew ba katkum ka tenth schedule jong ka riti synshar ka ri, ki MLA ba la shah sospon kum u Gabriel Wahlang bad Charles Marngar, kin nym lah ban shim rai ban phet ne pyniasoh sha kiwei ki party. U la ban khia ruh ba ki MLA ba la shah sospon kin nym lah ban shim rai ha kaba soi kyrteng bad dei namar kane ka daw ka don ka jingeh ia ki ha kaba ki lei tba pyniasoh sha ka NPP party.
Shuh shuh, u l aong ruh ba ka rai jong ka Congress ban ia khun sha ïingkashari ka iai halor kane ka rukom kiba dei katkum ka tenth schedule, ha kaba ki hap peit ruh katkum ka rai ba khatduh u Speaker bad ka ïingkashari.
