U Secretary jong ka Harijan Panchayat Committee (HPC), u Gurjit Singh mynta ka janmiet u la pyntip paidbah ba na ka liang ka HPC ka nym lah satia ban ai ia ka rai ba khatduh kumba la dep ban iakren hadien hadien ka jingiakynduh bad u Bah Sniawbhalang Dhar, Symbud Myntri Rangbah ka jylla ha kine ki khyndiat taiew ba lah dep.
Utei u nongialam ka HPC, u la pyntip ba katei ka jingbuh por tang ar taiew ban shim rai khatduh, ka long kaba thmid bad lyngkot palat kim pat ioh por wat ban twad jingmut na ki bor bah eh jong ka jaidbynriew Sikh kiba khmih kum ia ka Sri Akal Takht Sahib, ka Shiromani Gurdwara Prabandhak Committee ha Amritsar, ka Delhi Sikh Gurdwara Management Committee bad kiwei kiwei de.
“Ka jingbtin lynti jong ki nongialam kiba la rangbah ka jingmut jingpyrkhat ka long kaba donkam bha bad kumba long mynta, kitei ki nongialam, ki la dep don lypa ia ki prokram bapher bapher ha kine ki ar-lai taiew”, la ong u Gurjit Singh.
Kumta halor kitei ki nongrim, ka HPC ka ai jingmut bad pan por biang na ka sorkar jylla ban pynjlan biang ia kane ka mat tad haduh ka taiew ba khatduh jong u bnai Nailar bad kyrmen skhem ruh haduh katei ka por, ka HPC kan lah ban shim ia ka rai kaba khatduh lyngba ka jingai jingmut jong baroh ki nongialam ka jaidbynriew Sikh.
