Ka Seng Samla Assisi Byrnihat Parish ha ka sngi, ki la ioh ban pynkut noh iaka seminar jong ki samla kaba 2 sngi kaba la pynlong ha ka Hall ing skul ka Savio Higher secondary school Baridua, haka ba la ia shim bynta shitrhem da ki samla kynthei bad shynrang ki ba hap hapoh ka Byrnihat Parish.
Hakane ka seminar jong ki samla la sdang naduh ka sngi Saitjain lyngba ki prokram bapher bapher ba kynthup ruh iaka jingiakop ‘Extempore speech’ bad ka jingiasyllok halor ka phang jong ka ” Jingkordor jong ka Sacrament Jingpyniasuk” bad ki wei ki wei. Nalor ki samla la wan ban ia don lang ha kane ka sngi da U Fr. Kmenlang Nongrum, I Fr. Gerald Khongji bad I Sr. Theresa Nongrum.
Mynta ka sngi kaba dei ka sngi U Trai la pynkut ia kane ka jingiakynduh lang jong ki samla la sdang da ka mass Bakhuid ba U Fr. Kmenlang Nongrum u la shim bynta ban pyndep ia ka niam ka rukom.
Kum u Kpa mynsiem, u la la sam shibun ki symboh pyrkhat ki ba ia hap bad ka jingim ki khun samla ba ki dei ban pynbor ialade ban duwai bad ban pule ia ka ktien ka jong u Blei, khnang ba kin jied iaka lynti ka ba bha kaba ia dei dur ba ka jinglong kum kita samla Kristan.
U la kren ruh ba ki khun samla mynta bun ki dom ne bitar ia ki kmie ki kpa haba ki sdang ban sneng ban khraw namar ka don ka jing sngewmeng hapoh ki jingmut jing pyrkhat ka jong ki, shuh shuh, ki samla mynta bun ki la pynlut por ban lehkmen sha bar hynrei kim ai por shuh ia u Blei lane ban leit sha ingmane.
Ban saindur ia ka lawei ki khun samla ha ka Balang bad ha ka imlang ka sahlang u Fr. Nongrum u la kyrpad iaki samla ba ki dei ban jan sha u Blei bad ban jied iaka lynti kaba u Jisu u la hikai khnang ba ka lawei ka jongki kan long kaba skhem.
Lyngba jong kane ka sngi, hadien ka mass bakhuid la donruh ka jingiasyllok hapdeng ki para samla bad ban sam iaka ktien jong u Blei, haka ba don lang da u Fr. Kmenlang Nongrum ki sister jong ka SMMI provincial house ki Rangbah balang, u president jong ka seng samla Byrnihat u Ajoy Syiem bad ki wei kiwei ki nongkit kam jong ka seng samla.
