Hadien ba la bteng biang ka Dorbar synrai mynta ka sngi, kaba la poi sha ka sngi kaba bud hadien ba la sdang ka Dorbar synrai, u Bah Ardent Miller Basaiawmoit kum u President bad MLA ka VVP, u la ai khublei kyrpang ia u Myntri rangbah ka jylla halor ka jingtbit jong u ban khwai ia kiwei ki MLA sha ka party NPP.
Kum ban pynkynmaw, kane ka jingai khublei kyrpang u Bah Ardent Miller Basaiawmoit ia u myntri rangbah, ka dei hadien ba 3 ngut ki MLA na Congress kiba kynthup ia u MLA ka Umsning, u Dr. Celestine Lyngdoh, u MLA ka Mawhati u Bah Charles Marngar bad u MLA ka Nongstoin u Bah Gabriel Wahlang ki la pyniasoh sha ka party NPP bad ha kane ka dorbar synrai ki la don sha ka thup jong ka NPP party.
U Bah Miller Basaiawmoit, u la shim kabu ban ai khublei ia u myntri rangbah ka jylla, ka dei hadien ka jingailad u Shnongknor ka ïing dorbar thaw ain u Thomas A. Sangma ha ka jingiatai lyngkot ‘Short Duration Discussion” ha kane ka Dorbar synrai, kaba u la pynpaw ba u Myntri Rangbah ka jylla u Conrad K. Sangma u don shisha ia kata ka jingtbit ban khwai ia kiwei ki MLA ban don sha ka thup jongki.
Shuh shuh, u la shim ruh ka kabu ba kitbok kitrwaing ia u myntri rangbah ka jylla uba ioh kloi noh ia ka jingkoit jingkhiah kumba mynta u don hapdeng ka jingshitom khnang ba un ioh shim bynta lang noh ha kane ka dorar synrai.
