Ki bor pyniaid ka Chief Minister Youth Centre (CMYC) ha ka shnong Saiden sa shisien pat ka la ioh ban pynlong da ka 2nd Exhibition ban pyninam ia ki sap ki samla shnong ia kaba la saiñdur da kane ka centre lyngba ki jinghikai bapher bapher, la ka dei ha kaban saiñ ia ki umsoh, ki ashar, ka thaiñ sopti bad kiwei kiwei ia kaba la pyninam ha ka program ba la pynlong ha ka shnong Saiden.
La wan ban ai mynsiem bad ban sakhi ia ki kam ka CMYC, da ka Kong RB lyngwa, District Sericulture Officer, Ri bhoi District kum ka kongsan, la ia donlang ruh u Bah EK Lapang, Rangbah Shnong Saiden, ki nongialam jong ka Seng Samla, Seng Longkmie, Youth Club, ki nongtrei jong ka CMYC, Ki khun samla jong ka shnong Saiden lem bad kiwei kiwei.
Kumba la maitphang da u Rangbah Shnong Bah EK Lapang, la pyntip ba ki kam ba la shakri da ki nongtrei jong ka CMYC ki long shisha kiba dei ban ai ka jingiaroh kaba khraw namar ba ki la lah ban saiñ dur shisha ia ka sap ki phong jong ki samla nongshong shnong ha kiba bun ki liang, naduh ka jinghikai ban saiñdur ia ki umsoh na ki soh bapher bapher, ki jingshna kti ba la saiñdur na ki sladieng, ki rukom thaiñ sopti bad kiwei kiwei.
U la iathuh ruh, ba kane Kan dei ka sien kaba ar ba ka Dorbar Shnong Saiden ka la bteng ban ia soi soskular bad ka CMYC ban bteng ia ki kam hikai ia ki khun samla lem bad ki heprit ba kin lah ban pynjanai ia la ki sap ki phong bad ban nang pat kumno ban pyndonkam ia la ka sap ha kaban seng kam sengjam ban pynmih ia ka kamai jakpoh lade.
Ka Kong RB Lyngwa, kum ka kongsan ka la ai jingiaroh ia ki bor ka CMYC kiba khlem da shongthait ne pynsepei ia ka lad ban iatreilang bad ka Dorbar Shnong Saiden ha kaba saiñdur ia ka lawei ki khun samla jong kane ka shnong bad ki Shnong ba marjan lyngba ki lad jinghikai ha kiba bun ki liang.
Ka la kitbok kitrwiang ruh, ia ka CMYC ba kan nang lah ban bteng ia la ki kam shakri ha ka imlang sahlang khnang ba ka jingmyntoi kan long na ka bynta ban pynphyrnai ia ka lawei jong ki khun samla, da kaba kyntu ruh ia ki samla ba kin pyndonkam hok ia ki lad jinghikai ba ki la ioh bad ban nang kyntiew ia ki na ka bynta ka jingmyntoi bad ka lawei jong ki hi.
La pynshongkun ia kane ka 2nd Exhibition ka CMYC da ka jingiashimbynta ki heprit bad ki khun samla ka shnong Saiden ban pyni ia ki sap ha ka shad bad ka rwai.
