Ha ka jingialehkai ka English Premier League ha ka miet sngi u Blei, ka jingiakhun hapdeng ka Manchester United pyrshah ia ka Liverpool Football Club, ka Liverpool ka la lah ban pynliem ia ka Manchester Unted da 3-0.
Katei ka jingialehkai hapdeng kitei ki kynhun ba radbah ha ka English Premier League, ka dei ha Old Trafford kaba dei ka madan ialehkai jong ka Manchester United bad ha katei ka jingiakhun, ka Manchester United ka la hap ban pdiang ia ka namrem kaba 3-0, ha la ka jong ka madan bad hakhmat ka jingdon jong bunbah ki nongkyrshan ba radbah jong katei ka klob.
Ha ka kylla step jong ka jingiakhun, ka Liverpool ka la lah ban lamkhmat ia ka jingiakhun lyngba ki ar kol, kiba la thep da u Lius Diaz, kiba u la thep ha ka minit ba 35 bad 42, ha kaba ka kylla step ka la kut da kaba ka Liverpool ka tam da 2-0.
Haba bteng ka kylla miet, ka jingiakhun ka la nangiakhaid eh, namar ki rangialehkai ka Manchester United, ki la pyrshang ban lehkai bha na bynta ban ioh pynphai ia kitei ki kol ba la shah thep, hynrei kim lah ban leh ei ei, namar ka jingtbit ki rangialehkai ka Liverpool, ka jingiakhun kaba la they umpjah syndon ia ka Manchester United, ka dei hadien ka kol kaba la thep da u M. Salah ha ka minit ba 56, kaba la neh haduh ba kut ka jingiakhun bad kaba la pynlong ia ka Manchester United ba kan pdiang ia katei ka namrem hakhmat ka Liverpool.
