Ki shipai jong ka Border Security Force (BSF) ha ryngkat ka jingiatreilang bad ki bor pulit ka jylla Meghalaya, hynnin ka sngi ki la ioh ban kem noh ia uwei u nong Bangladesh ha ki khappud ka ri India bad ka Bangladesh halor ka jingdonkti ban pynrung beain ia ki nong Bangladesh sha ka ri India lyngba ki khappud ka jylla Meghalaya.
Utei u nong Bangladesh uba la shah kem noh, la tip kyrteng kum u Mohd Mijan Mia, 49 snem ka rta na ka Sunamganj District jong ka ri Bangladesh.
Katkum ka tyllong khubor, la iathuh ba ki shipai BSF na ka 193 Battalion ha ka jingkhynra kaba la pynlong ryngkat bad ki pulit ka jylla Meghalaya. Ki la ioh ban kem ia utei u Mohd Mijan Mia na kawei ka khlaw kaba don ha khappud jong ka jylla Meghalaya bad Bangladesh.
La iathuh ruh ba ha ka jingtohkit, utei u nong Bangladesh u la phla ba u ju donkti ban pynrung beain ia ki nong Bangladesh sha ka ri India ryngkat bad ka jingshalan ia kiwei kiwei kiwei de ki mar ki mata.
Ia une u nong Bangladesh uba la ioh ban kem noh hynnin ka sngi, la aiti noh sha ki bor pulit ka thanad Dangar na ka bynta ban pynlong ia ka jingtohkit bad ruh ban pynshitom ia u katkum ki kyndon jong ka ain.
