Ha kawei ka jingjia ba sngewsih mynta ka sngi, kawei ka longkmie na Nongstoin kala duh noh iala ka jingim hadien ba kala shah rong ha ka umsaw kaba la wan kynsan kynsan katba ka dang saitjain ha ka Wah Porjalem kaba hap hapoh u pud shnong jong ka Mawkawah, West Khasi Hills District.
Katkum ka tyllong khubor bala ioh lum, la iathuh ba kane ka jingjia, kala jia ha ka por nohphai sngi katba katei ka longkmie ryngkat bad lai ngut kiwei pat kiba leit ban saitjain lang, tang mar ia sdang ther u slap, ki la mareh noh sha ryngkew, hynrei sngewsih ba katei ka longkmie kam shym la lap shuh ban phet na katei ka jaka, katba kitei kiwei pat ki poi sha ryngkew bad lait na katei ka jingjia ba sngewsih.
Katei ka longkmie kaba ngat ha katei ka apot la tip kyrteng kum ak Rilinda Symbei, 24 snem ka rta na Nondeiñ jong ka shnong New Nongstoin. Ia ka met kaba sah jong kane ka longkmie la ioh ban sei na ki bynta ba kham sharum jong katei ka wah, kata ha ka por kumba 4:30 baje janmiet da ki pulit ka thanad Nongstoin bad jong ka Fire & Emergency Service ryngkat ka jingiarap ki paidbah.
Ia ka met jong katei katei ka longkmie, la pynkit noh sha Civil Hospital Nongstoin na ka bynta ban pyndep ia ki jingdonkam katkum ki kyndon ain hashwa ban aiti pat sha ki bahaing ba kin pyndep ia ka jinglehniam ba khatduh.
