Namar ka jing jyllei ki kam sniew naduh ka tuh ka thim bad ka jingkynrei u drok haka imlang ka sahlang khamtam hapoh ka sor Nongpoh, Ki khlieh shynshar jong ka Dorbar Shnong Nongpoh kiba kynthup ïa u Bah Sylvestar Mynsong kum u rangbah Shnong, Samla Anthony Suchiang Secretary Shnong lem bad ki dkhot jong ka Dorbar bad ka Seng Samla Shnong Nongpoh mynta ka sngi ki la leit ban kynduh ïa u Ophisar In-charge ka Nongpoh Police Station na ka bynta ban ïa kren ïa kitei ki mat bad khamtam ban ïa kren ruh halor ka jingjia shah kyndang ki dukan kiba la jia na ka por sha ka por ha sor Nongpoh.
Haba kren naka liang u Rangbah Shnong ka Nongpoh u Bah Sylvestar Mynsong u la pyntip ba naka liang ka Dorbar ka la leit ban buh ïaki jingkyrpad ïaka tnad pulit jong ka Nongpoh ba kin peit pyrman ïa kine ki kam sniew da kaba phah ban ïaid pahara ïaki Pulit man la ka miet.
Ha kajuh kapor u la ïathuh ruh ba naka liang ka Dorbar Shnong Nongpoh ka la kyrpad ruh ïaka Police Department ba kin ïaleh ban weng noh ïaki Kali ba kasiden ba la buh shu buh khongreng haki Surok Service Lane kaba la wan rah ïaka jingwit haka ïaid ka ïeng jong ki paidbah.
Naka liang u OC ka Nongpoh MR Marak, u la ïathuh ba naka liang ki pulit ki la ïaleh ban buddien ïa kine ki kam tuh kam thim kiba la jia ha kine ki sngi da kaba pynlong ruh ïaka jingpahara miet hakaba ki la ïoh ruh ban kem ïaki Nongleh kam sniew ha kine ki sngi ba la leit.
Shuh shuh, u la kyrpad ruh ia ki bor shnong bad ki samla shnong ba kin ai lang ia ka jingiatrei lang na ka bynta ban tehlakam ia kine ki kam sniew bad lada don ka jingiatrei lang kan pynsuk ruh ia ki bor puli tban peitpyrmin ne peitngor ia ka jingmih ki kynhun runar kiba ju leh ia ki kam sniew ha ka thain Nongpoh.
