Ha ka jingiakhun ha ka Indian Super League kaba la long hynnin ka miet sngi u Blei bad kaba la long hapdeng ka Kerala Blasters Football Club pyrshah ia ka Punjab Football Club, ka Punjab FC ka la ioh ban khur ia ka namjop kaba nyngkong, hadien ba ki la lah ban pynliem noh pyrshah ia ka Kerala Blasters FC da 2-1 ha ka jingiakhun kaba la long ha Nehru Stadium ha Nongbah Kochi.
Haba phai sha ka jingiakhun kaba la long hapdeng ka Kerala Blasters pyrshah ia ka Pynjab FC, ka la dei ka jingiakhun kaba iakhaid eh bad kaba iakajuh bar hapdeng kitei ki kynhun, ha kaba ka kylla step jong ka jingiakhun, ka la kut ha ka jingiakhaid kaba ym don kiba lah ban pynkhih jar.
Haba la poi ha ka kylla miet, ka jingiakhun ka la dei kaba kham shongshit shuh, namar kitei ki kynhun ki la kwah ban thep kol, khnang ba kin ioh ban khur ia ka namjop ha katei kaba sdang jong ka jingiakhun jong kitei ki kynhun kiba radbah hapoh ka ISL.
Katba ka jingiakhun ka la iaid shakhmat bad dei ha ka minit kaba 86 ba ka Punjab FC ka la ioh ban pynkhihjar nyngkong bad kaba la wan ha ka dur jong ka Penalty, ia kaba la thep da u Luca Majcen.
Mar ia shah theh kol, ki rangialehkai ka Kerala Blaster FC, ki la pyrshang ban pynphai ia katei ka kol kaba ki la shah thep bad kumta ka la jia ia ka Kerala Blasters ba ka la ioh ban pynphai ha ka minit ba 90+2 ia kaba la thep da u Jesus Jimenez, hynrei katei ka kol ba pyniakhaid kam shym la neh slem, namar ha ka minit ba 90+6 ka Punjab FC ka la ioh ban thep biang sa shi kol ia kaba la thep da u Fillip Mrzljak bad kaba la pynthikna syndon ia ka kynhun ba kan khur ia ka namjop ha kaba sdnag jong ka ISL ka samoi 24/25.
