Saw ngut ki riew rangbah ki la mynsaw jur hadien ba la kynnoh ba ki la shah pom pyrthat katba ki dang ia rieh slap hapoh u wei u diengjri, kane ka jingjia ka la jia hynnin ka sngi ha ka shnong Mowshadep hapoh ka Laskein Block ha West Jaiñtia Hills District.
Katkum ka khubor, ba la iohlum, la iathuh ba kitei ki rangbah kiba la mynsaw ha ka jingshah pom pyrthat, ki dei kiba la leit ban sngewlem sha kawei ka iing iap briew ha ka shnong Mowshadep bad ha ka por 2 baje eiei ka la don ka jinghap slap bad ka jingpom pyrthat ha katei ka jaka bad kine ki rangbah ki la leit ban rieh ialade ha trai jong u diengjri tad haduh ba kane ka jingjia kaba sngewsih ka la jia.
Ia kine ki rangbah ba la mynsaw jur la ithuh kyrteng kum u Hep Suting na ka shnong Mooshrot, u Embok. Tyngkan na ka shnong Niawkmai, u Pura Sten na ka shnong Mukroh bad u Samaia Lyngdoh na ka shnong Sahsniang.
Ia kine ki rangbah ba la mynsaw jur, la pynkit noh marmar sha hospital da ki riew paidbah kiba la sakhi ia katei ka jingjia shah pom pyrthat pyrshah ia kine ki rangbah.
