Ki nongkitkam ka Mawtneng Sports & Cultural Association, ki la pynkup burom ia u samla Kitborlang Kharlukhi, u samla na katei ka shnong bad uba la ioh ia ka nam kum u Best Coach ha ka U-17 International Subroto Cup 2024 kaba dang shu dep shen ha Nongbah Delhi.
Kumba ban shu kdew hangne, ba u samla Kitborlang Kharlukhi, u long kum u Coach ia ki khynnah skul ka Mynken Christian Higher Secondary School, Bhoirymbong, kaba la mihkhmat ia ka jylla sha ka U-17 International Subroto Cup ha Nongbah Delhi, ha kaba ka la poi shaduh ka thup ka Phainal bad kaba la shah rem noh hakhmat ka skul na ka jylla Manipur.
Dei halor kata ka nongrim, ba utei u samla na ka shnong Mawtneng, u la lah ban batai bha ia ki khynnah kiba la mihkhmat ia ka Mynken Christian HSS bad uba la ioh ruh ia ka nam kum u Best Coach, ka la pynsngew sarong eh ia ka Mawtneng Sports & Cultural Association, kaba la pynlong ruh ia ki ba kin pynkup burom syndon ia u samla Kitborlang Kharlukhi hapoh ka Iing Dorbar jong ka shnong Mawtneng.
Ha katei ka jingialang pynkup burom ia u samla Kitborlang Kharlukhi, ki nongialam ka Mawtneng S&CA, ki la ai mynsiem ia utei u samla, da kaba pynpaw ba u dei ban pdiang beit ia ki jingshah kynthoh ne kiba bein laiphewjait, kata ka dei tang namar ba ka Mynken Christian HSS, kam shym la lah ban khur ia ka namjop ha katei ka lympung ialehkai phutbol, ha kaba ka jingkyntu jong ki, ka long ba u dei ban pdiang beit ia kiba iaroh bad ia kito kiba bein ruh kumjuh, ha kaba dei ban shim beit kum ki kyntien ba ai mynsiem.
