Ka Myntri ka tnad ka Koit ka Khiah, ka Dr. Mazel Ampareen Lyngdoh ka la khot kyrpad ia ki samla pule kiba la pyndep ia ka kyrdan pule MBBS lyngba ka bhah (quota) napoh ka jylla Meghalaya ba kin wan shakri noh shapoh la ka jylla kaba dang donkam ia ki doctor specialist ha ki liang bapher bapher.
Haba kren bad ki Nongthoh Khubor, ka Dr. Ampareen Lyngdoh ka la iathuh, ba ka jylla Meghalaya kumba long haduh kane ka khyllipmat hi ka dang donkam bha ia ki doctor specialist bad kum ka jylla ka dang ap khmieh lynti na ki doctor kiba na shabar ka jylla.
Ka la ong ruh, ba ka jingkhot ia kito ki samla kiba la pyndep ia ki jingpule MBBS lyngba ka state government quotas ka long ruh halor ka nongrim ban pynbeit bad pynbiang ia ki soskular (bond) ba la ia soi hapdeng ka sorkar bad ki tnad pule bapher bapher.
Shuh shuh ruh, ka Kong Ampareen Lyngdoh ka la kren tyngeh, ba kumba long mynta ka jingwan phai Jong ki samla pule kiba la pyndep ia ki jingpule MBBS lyngba ka jingiarap da ka sorkar jylla Meghalaya ki duna bha kumta na ka liang ka sorkar jylla kam banse ban shim pat da ki lad kiba kham tyngeh.
“Ka long kaba kongsan eh, ia kito ki samla pule kiba la pyndep ia ki jingpule doctor ban wanphai bad ban ai jingshakri ha ka jylla Meghalaya katkum ki kyndon ba la dep ia soi”, ong ka Dr. Lyngdoh, da kaba bynrap ba ka jingeh hi ka dei namar kat haduh mynta ka jylla Meghalaya kam pat don ia ka medical council kaban tehlakam ia kine baroh.
