Ki Pulit ka East Khasi Hills kila kem ia 2 ngut ki dkhot ka Hynniewtrep National Youth Movement (HNYM) lem bad 2 ngut kiwei pat halor ka jingdonkti ban dawa pisa bad byrngem iaka khun kynthei jong uba shah dawa pisa.
Ki 2 ngut ki dkhot ka HNYM kiba shah kem ki kynthup u Gedian Khongwir (30 snem) bad u Kyrshanbor Lyngdoh (38 snem) lem bad 2 ngut kiba kynthup u Thounaujam David Singh, (41 snem) bad u Narendra Kabrambam (29 snem).
Ka kyrwoh na u Superintendent of Police (SP) ka East Khasi Hills u Bah Sylvester Nongtnger ka iathuh ba haka 8 tarik Nailar, uwei u rangbah haka por 7 baje janmiet u la phone sha u nongujor bad la dawa T.10 lak.
U SP u la pyntip ba u nongujor u khlem patiaw iaka jingdawa bad hadien kane u ba dawa lem bad 2 ngut kila rung jubor ha ka ingsah hynrei uba shah dawa u khlem don ha ing.
U heh Pulit u la iathuh ba haka 20 tarik Nailar ki nongdawa pisa kila rung jubor sha ingsah bad kila byrngem iaka khun kynthei jong u ba shah dawa pisa.
Haba iadei bad kane u rangbah ba shah dawa pisa u la ujor daka ejahar ha Madanrting Police Station bad ki Pulit kila kem ia 4 ngut kynthup 2 ngut ki dkhot ka HNYM.
U SP u la pyntip ba la dep ban Register iaka Case ha Madanrting Police Station bad ka jingtohkit ka dang iaid shakhmat.
