Ka Seng Ri Bhoi Tourism & Environmental Development Forum (RBTEDF) kum kawei na ka seng kaba ju kyntiew ia ki kam jngohkai pyrthei bad ban iada ia ka mariang ka la rai ban rakhe ia ka World Tourism day ka ban sa long ha ka 27 tarik u Nailur 2024 ha Orchid Umiam.
Kumba la pyntip da u Bah Plielad Tiwsoh, uba dei u President katei ka Forum, la ong ba ka jingthmu ban pynlong ia kane ka jingrakhe ia ka World Tourism Day, ka dei shi bynta ban pynsgewthuh sha ki paidbah halor ka jingdonkam ban kyntiew ia ki kam jngohkai pyrthei na ka bynta ban kyntiew ia ka ioh ka kot ki paidbah lyngba ki kam jngohkai pyrthei.
U la iathuh ruh ha katei ka sngi, yn sdang shuwa da ka jingiamareh marathon na Umbang bad pynkut ha Pung Umiam (Orchid Umiam) bad bud sa ka jingpynkhein paidbah ia ki jaka ba ju wan jngohkai ki nongjngohkai pyrthei ban ia snoh kti lang da ki Dorbar Shnong Umiam.
U la ong ruh hadien ka jingpynkhuid ia ki jaka ha ki bynta bapher bapher jong ka pung umiam, kan sa don sa ka prokram ai jinghikai halor ki kam jngohkai pyrthei bad kiwei kiwei ki bynta na ka bynta ka khuid ka suba bad kin don ruh ki proram bapher bapher ban shim bynta da ki samla, kaba long shi bynta ban ialap halor ka jingdonkam ban iatrei lang ki paidbah ba kim dei ban ktah ia ki nongwan jngohkai pyrthie, namar ki nongwan jngohkai pyrthei ki kyntiew ia ka ioh ka kot ka jylla bad ruh ka ioh ka kot ki paidbah nongshong shnong ka jylla.
Shuh shuh, u la ong ruh yn pynkut ruh ia kane ka jingrakhe ia ka World Tourism Day da ka jingsam ia ki khusnam sha ki nongjop bapher bapher ha kane ka sngi, kiba kynthup naduh ka jingiakop mareh marathon, ka jingiakop rwai, shad bad kiwei kiwei ki jingiakap tynrai, kaba long ka jingpynshlur ia ki paidbah ba kin sngewthuh ia ka jingkordor jong ka kam jngohkai pyrthei kaba kyntiew shisha ia ka ioh ka kot jong ki paidbah ha ka jylla.
