Ki nongialam bad ki dkhot ka KSU Nongpoh Town Unit mynta ka sngi ha ka jingialam u Samla Iabhalang Nongrum lem bad ki dkhot ki la bteng ban sam ia ki kot lyngkdop sha ki paidbah kaba long shi bynta ka thong jong ka seng kmie ban dawa ban don ka jingthungkam thungjam kaba khuid kaba suba ha ka jylla.
Na ka liang ki nongialam ka KSU Nongpoh Town Unit ki la shim ia kane ka bynta ban leit sam ia ki kot lyngkdop, ka dei halor thong jong ka sengkmie lyngba ka Publicity Cell, na ka bynta ban ialap halor ka thong jong ka KSU ba ka la dawa na ka sorkar ba ka jingthung kam thungjam ha kano kano ka tnad sorkar ka dei ban long kaba khuid kaba suba.
Kum ban pynkynmaw, dan shen ka seng kmie ka la iakhih ruh halor ka thungkam ka thungjam ha ka MPSC ba kala dawa ba ka dei ban long kaba khuid kaba suba bad khlem kano kano ka jingleh shiliang khmat bad la dawa ruh ba kito ki samla kiba don hok ban ioh ia ka kam ki dei ban ioh ia ka hok khlem da don kano kano ka jinglehtuh leh rieh.
Na ka laing kine ki nongialam bad ki dkhot ka KSU Nongpoh Town Unit ruh mynta ka sngi kum ban kyrshan halor ka thong ka seng kmie, ki la mih ban leit sam ia ki kot lyngkdop sha kiba bun ki skul ha ka thain Nongpoh bad kynthup ruh ha Ri Bhoi College, na ka bynta ban pynshai sha kiba bun ki samla ba ka KSU ka ieng halor ka Nongrim ne ka thong ba ka jingthungkam thungjam ha ki tnad sorkar bapher bvapher ka dei ban long kaba khuid kaba suba.
