U Conrad K. Sangma, Myntri Rangbah ka sorkar Meghalaya, u la pynpaw ia ka jingai khublei kaba ia ka kynhun ialehkai phutbol U-17 ka India, namar ba ki la lah ban wanrah nam ia ka ri India hi baroh kawei, lyngba ka jinglah jong ki ban long kum kata ka nongjop ha ka SAFF U-17 Championship 2024 kaba la kut hynnin ka sngi ha Bhutan.
Nalor ka jingai khublei ia ka kynhun ialehkai ka ri, u Conrad K. Sangma, u la ai ruh ka jingkhublei kaba kyrpang ia arngut ki samla Khasi na ka jylla Meghalaya bad kiba la don bynta ha ka kynhun ialehkai U-17 ka India, kiba ki kynthup ia u samla Manbhakupar Malngiang bad u samla Balamkupar Rynjah.
U Conrad K. Sangma, u la pynpaw ruh ba ka jingdon bynta ki samla Khasi na Meghalaya ban ioh mihkhmat ia ka kynhun ialehkai ka ri, ka dei shisha kaba la wanrah burom ia ka jylla hi baroh kawei bad khamtam eh ba ki la long kum ki nongjop ha katei ka lympung ialehkai.
Ka jingai khublei u Conrad K. Sangma, ka dei hadien ba ka kynhun ialehkai U-17 ka India, ka la jop da 2-0 pyrshah ia ka Bangladesh ha ka jingiakhun phainal kaba la long hynnin ka sngi ha Changlimithang Stadium, Thimphu, Bhutan.
