Ka kynhun ialehkai phutbol U-17 ka India, ka la ioh ban rah ia ka nam lahduh ha ka SAFF U-17 Championship 2024, ia kaba ka South Asian Football Federation (SAFF) ka la pynlong ha ri Bhutan.
Ka jingiakhun phainal ne ban knieh ia kata ka nam lahduh, ka la long hapdeng ka India pyrshah ia ka Bangladesh, ia kaba la pynlong ha Changlimithang Stadium, Thimphu, Bhutan bad ha katei ka jingiakhun phainal, ki khynnah U-17 ka India, ki la lah ban pynliem noh ia ka Bangladesh da 2-0 bad ban pynthikna syndon ban long kum ka lahduh ha katei ka lympung ialehkai phutbol.
Ia kitei ki kol na bynta ka India, la thep da u Mohammed Kaif ha ka minit ban 58 lem bad u Md Arbash, uba la ioh ban thep ha ka minit ba 90+5, kaba la pynbiang pura ia ka kynhun ialehkai ka India ban long kum ka lahduh ha katei ka lympung.
Khyndiat kum ban shu kdew hangne, ba ha kane ka SAFF U-17 Championship kaba la long ha Bhutan, la don arngut ki samla Khasi kiba la don bynta lem bad ka kynhun ialehkai ka ri, kita ki kynthup ia u Manbhakupar Malngiang bad u samla Balamkupar Rynjah.
Ha kane ka SAFF U-17 Championship 2024, ki la don 7 tylli ki kynhun ialehkai na kiwei pat ki ri, kiba kynthup ia ka India, Bangladesh, Pakistan, Sri Lanka, Maldives, Bhutan lem bad ka Nepal.
