Ka KSU North Khasi Hills District ryngkat ka KSU MGU Unit mynta ka sngi ka la pynlong ia ka prokram ai jinghikai kaba kyrpang shaphang ka jingktah ka shongkha khynnah, ban kyntiew ia ka pule ka puth bad ruh ban ai jinghikai ia ki samla ban lait na kiwei kiwei ki jingmlien ba sniew.
Ia kane ka prorkam la pynlong ha Lumnongrim Presbyterian Secondary School, Lumnongrim, Byrnihat, ha kaba ki khynna skul naduh ka Klas-7 haduh ka Klas-10 ki la shim bynta ha ha kane ka prokram.
Ki nongai jingkren ha kane ka prokram ai jinghikai kynthup ia u Samla Herliroy Suitng, Assistant Education Secretary ka KSU North Khasi Hills District, u Samla Laraplang Nongbri, Assistant Education Secretary ka KSU North Khasi Hills District Unit bad ruh u Samla Welclanstar Lyngdoh Mawphlang President KSU MGU Unit.
Kumba la pynpaw da kitei ki nongialam, ka thong jong kane ka prorkam ai jinghikai seng, ka long shi bynta ban pynshai sha ki samla ka trai jylla ba kin long kita ki samla kiba don ka jingiohjngai bad ruh ba kin long ki samla kiba dei ban don ka mynsiem ka jingiatrei lang na ka bynta ban kyntiew ia ka ri bad ka jaid bynriew.
Ha kane ka sngi ki la kren ruh halor shibun ki bynta ka jingktah jong ka jingshongkha khynnah, ka jingktah ba ki khynnah ki ngop ha ka jingmlien basniew, ba kum ki samla ki hap ban long phikir ban lait na ka jingshah ktah ha ka jingim jongki. Kine ki nongialam ka seng ki la ai mynsiem ruh ia ki samla ba ki dei ban phai khmat ban poi sha ki kyrdan ba shaneng ha ka pule ka puthi, namar kumba long haduh mynta ka jylla ka dang donkam shibun ki samla kiba poi sha ki kyrdan ba shaneng ban kit ban bah ia ka eh ka shon ka jaid bynriew.
