Ka kynhun ki samla kiba la pass ia ka eksam thepkam na bynta ki post staff Nurse bad ANM, ki la mih shakhmat ban dawa na ka sorkar jylla ba kan khot noh ia ka Physical Verification bad ban pyniaid beit ia ka rukom thepkam hapoh ka jylla.
Lah ban kdew ba dang ha kine ki khyndiat sngi, namar ka jingdon ka jingpyrshah ha kaba ia dei bad ka rukom thepkam Staff Nurse bad ANM, la mih ka kynhun kiba la dawa na ka sorkar jylla ban pynsangeh ban pyniaid ia ka jingthepkam shwa ia kitei ki post.
Ki samla kiba la pass ia ka eksamin thepkam ia kitei ki post lyngba ka samla Merybahun Marbaniang, ka la pynpaw, ba ki dei na ka kynhun jong kito ki samla kiba la pass ia ka eksamin ia ki post staff Nurse bad ANM kaba la pynlait ha ka 28 tarik Nailur 2024.
Kum ka kynhun jong ki samla kiba la pyndep hok ban thoh ia ka eksamin bad ban pass ruh, kumta ngi dawa na ka L Meghalaya Medical Service Recruitment Board (MMSRB) ban pynlong noh ia ka Physical Verification ban thep kam noh ha kito ki post ba lait.
Ha kaba iadei pat bad ka jingmih kawei ka kynhun ba pyrshah ia ka resol ba la pynbna da kaba kam ruh ba ka don ka jingbym leh hok, kine ki samla ki la pynpaw ba na ka liang ka MMSRB ka la dep ban pynshai kumba deihok bad ngim don eiei ban kren ne ong ha kaba ia dei bad katei ka kynhun kaba pyrshah, namar ngi dei kiba la passed ia kane ka eksamin kumta ngi donhok ban dawa ban pynlong noh kloi ia ka Physical Verification.
Na ka liang u Samla Iaishemphang Wankhar, u la ong, ba kum ki samla ki dap da ka jingkmen halor ka jinglah jong ka MMSRB ka la lah ban pynbna lut ia ki resolt ha ryngkat ki marks jong baroh kiba la iakhun ia kane ka eksamin bad ka long ruh kaba khuid nalor ka jingdon jong ki nongring dur ha ka por ba thoh ia ka eksam.
“Kita kiba pyrshah ki donhok ban iaid la ka bynta hynrei, ka MMSRB kam dei pat ban pynslem ban khot noh ia ka Physical Verification bad kine kiba pyrshah ruh ki lah ban thoh sha ka Grievance Cell jong ka MMSRB bad ka Board ruh kala ai por 10 sngi iaki samla ban ioh jingpynshai”, pynpaw u Iaishemphang.
Ha kaba ia dei bad ka jingpyrshah ia ka jingbym leh hok ban pynbna result, kine ki samla ki la kren shai, ba ka Eksam ka long kaba eh bha bad kiba iakhun na bynta ki post ba don tang kumba 164 tylli ka la kot sha ka 5000-6000 ngut, te kan shong ha kito kiba leh bha kin ioh keiñ ia u soh ka jingtreishitom jong ki.
