Ki Nongialam ka Hynniew Trep Youth Council, Ribhoi District bad ki nongialam ka Meghalaya People Social Organisation mynta ka sngi ki la hiar sha ka shnong Nongspung B. na ka bynta ban leit jngoh ia ki 5 tylli ki longing ba shah ktah na ka jingtih khyndew na uwei u lum ba don ha katei ka shnong.
Ha kane ka jingleit jurip la ialam da u Samla Tony Shylla Secretary bad u samla R.C Thangkhiew Vice President ka HYC Ri Bhoi bad ryngkat ki nongialam ka MPSP lyngba ka Kong M. Waniang kum ka President lem bad kiwei ki dkhot kine ki ar tylli ki seng.
Kitie ki san tylli ki longing ba la shah pynjulor da ka jingtih khyndew ki kynthup ia ka ing jong ka Kong Lijanta Sungoh, kong Premika Sungoh, kong Wompher Dhar, kong Mana Suting bad ka kong Kerning Sungoh bad kaei kaba ktah bha ia ki, ka long ba u trai katei ka jaka tih khyndew um treh satia ban siew ia ka jingjulor ki ing ki sem bad ki jingthung jingtep, ha kaba u la shu kular ban pynkhuid tang ia u shyiap bad ka khyndew ba tuid sha ki ing ki sem kiei ki longing.
Na ka liang u Rangbah Shnong u Bah Philimon Tongper ruh u la pynshai ba kane ka jingtih khyndew ka la ktah shisha ia kitei ki 5 tylli ki long, ha kaba kane ka jingtih khyndew ka dei kaba la 5 ne 6 bnai, hynrei ha kane ka por lyiur ba slap ka khyndew bad ki shyiap ki tuid sha kane ka shnong ba pynjot ia kitei ki ing ki sem ryngkat ki jingthung jingtep.
U la iathuh ruh ba kitei ki longing ba shah ktha ki la shah ktah jur shisha na ka jingpynjot ka jingshlei um bad ruh ba ka khyndew bad ki shyiap ki la rung lut sha ing bad tad haduh ba ym long shuh ban shong ban sah bad ruh ki ing ki sem ki la julor ba la donkam ban shna thymmai.
Ha kaba ia dei bad kane ka jingjia, na ka liang u u samla Tonny Shylla u la ong ba ka seng tang mar ia ioh jingtip halor kane ka jingjia ka la pynlong ia ka jingwan jurip bad ha ka jingjurip ka la lap shisha ba ka long kaba shisha bad kum kane ka jingjia ka seng kan nym lah ban pdiang.
Na ka liang kitei ki seng ki ki la dawa na u trai katei ka jaka ba un siew lem ia ka jingshah ktah bad na ka liang utei u trai ruh u la kular bad khamtam ban shna noh da ka kynroh ba katei ka khyndew bad ki shyaip kin num tuid shuh sha katei ka shnong lada hap u slap. Na ka liang kine ki ar seng ki la kyrpad jur ruh ba dei ba leh ei ei ia kitei ki longing ba la shah ktah.
