Ki paid Hindu ha ka thain Nongpoh mynta ba kynthup ia ka Ram Mandir bad ka Shree Shree Maa Kali Mandir mynta ka sngi ki la sdang ia ka jingrakhe ia ka Durga Puja bad ki paid Hindu ki la shim bynta da ka mynsiem jong ka jingshitrhem ban rakhe ia kane ka lehniam kaba ki ai ka nguh ka dem sha u blei.
Kane ka jinglehniam Puja ka dei kaba ki la ju rakhe man la u snem bad mynta u snem ruh ki paid Hindu ki la mih shakhmat ban rakhe ia kane ka lehniam, kaba ki ju leh niam ban pan ka jingkyrkhu na u blei na ka bynta ka shongsuk shongsain bad ruh na ka bynta ban beh ia ki kam sniew kiba ktah ia ka hok longbriew man briew.
Kumba la iohi mynta ka sngi, ki paid Hindu ki la pynkhreh pynkhrum da ki rong ki rup ban pynphuh pynphieng ia kane ka lehniam Puja.
Haba kren shad ki lad pathai khubor, u Secretary ka Ram Mandi u Munshwar Singh, u la pynpaw ia ka jingsngewkmen ba ki paidbah Hindu ha Nongpoh bad ha Ri Bhoi ki la ioh ka lad ban sdang ban rakhe ia kane ka lehniam Puja khlem kano kano ka jingpynthud bad kum ki paidbah Hindu ruh kin shim bynta ban rakhe ia kane ka lehniam ka long ban tehsong na ka bynta ban ka jingiatylli ha ka imlang ka sahlang.
U la ong ruh ba kane ka jingrakhe ia kane ka Durga Puja ka dei ka jingbeh ia ki jingsniew bad ban wan rah ia ka jingsuk ha kaba ki tyrwa sha kita ki blei ba kin ai ka jingkyrkhu kyrdoh ban wan ka shongsuk shongsain.
Shuh shuh, u la phah ruh ia ka khubor jong kane ka Durga Puja ba kum ki paid Hindu ki angnud ban pynneh ia ka shongsuk shongsain kam pher la ngi ia im ia sah lang na kano kano ka jaid bynriew bad dei tang ka shongsuk shongsain ngi lah ban kyntiew ia ka bha ka miat, ka roi ka par bad ka jingkiew shaphrang ha baroh ki liang, u la bynrap.
