Kum u MLA ka Jirang Constituency, hadien ba la ioh jingtip ba ka la don ka jingshah ktah ki longing na ka jingtih khyndew hapoh ka shnong Nongspung-B ba hap ha Jirang Constituency, na ka laing u Bah Sosthenes Sohtun kum u MLA mynta ka sngi u la hiar ban leit jurip ia kitei ki longing kiba la shah ktah na katei ka jingtih khyndew ha katei ka shnong Nongspung-B.
Kum ba pynkynmaw, kane ka jingjia ka la jia, ka dei na ka daw ka jingtih khyndew uwei u briew ba la tip kyrteng kum u Donald Srinate, ha kaba da ka jingjur slap, ka khyndew bad ki shyiap ki la tuid sha katei ka shnong ha kaba ki 5 tylli ki ing ki la julor bad shah ktah jur.
Kine ki longing ba la shah ktah na katei ka jingtih khyndew ki kynthup ia ka ing jong ka Kong Lijanta Sungoh, Premika Sungoh, Wompher Dhar, Mana Suting, bad ka ing jong ka Kong Kerning Sungoh.
Ha kane ka jingleit jurip, na ka liang u MLA ka Jirang u Bah Sosthenes sohtun kum ka jingiarap lem ia kitei ki longing, u la noh synniang T. 30 hajar ka pisa ban kyrshan lem halor katei ka jingshah ktah.
Ha kajuh ka por, na ka liang u MLA u la kular ruh ia ki ban kren sha ka ophis u Deputy Commissioner ka Ri Bhoi bad ruh sha u Block Development Officer ka Umling C&RD Block ba kin thaw ia ki lad ki lynti na ka bynta ki lad jingiarap na ka sorkar halor katei ka jingshah ktah na ka jingshlei um bad ruh na ka jingtuid ka khyndew bad ki shyiap kiba la pynjulor lut ia ki ing ki sem bad ruh ki jingthung jingtep.
