Ban ai mynsiem ia ki khun samla bad ban pynshlur ba kin pyndonkam hok ia ki sap bapher bapher ba ki don ha ka jingim la ka long ka pule ka puth, ka ioh kam ka ioh jam bad ka seng kam seng jam lajong, u MLA ka Nongpoh Constituency u Bah Mayral Born Syiem mynta ka sngi u la pynbna paidbah ban wan rah da kawei ka jingtreikam ban kyntiew ia ki khun samla ba la tip kum ka ‘Inspire & Inform’ bad ruh ka Village Education and Youth Empowerment.
Ia kane ka thong ban kyntiew ia ki khun samla ka Nongpoh Constituency bad ka Ri Bhoi District hi baroh kawei la pynbna da u Bah Mayral Born Syiem ha ka jingiakynduh bad ki nongthoh Khubor ha Circuit House Nongpoh bad ia kane ka projek ba la wan rah kyrpang da u MLA ka Nongpoh yn ia trei lang ruh bad ka El Elyon Institute Nongpoh ha ka jingialam u Bah Sainkupar Syngkli kum u Director katei ka Institutue.
Haba kren sha ki lad pathai khubor, u Bah Mayral Born Syiem, u la ong ba ha ka jingiaid lynti kum u nongmihkhmat paidbah u hap ban shim ia kane ka lynti ban kyntiew ia ki khun samla, kaba dei hadien ka jingiasyllok bad kiba bun ki riew rangbah, ki longkmie ki lkongkpa ha kaba la donkam ban don noh kawei ka jaka ai jinghikai kumno ban pyntbit ia ki samla bad ruh kin shlur ban leh ia kino kino ki kam hadien ba ki la ioh lum jingtip lyngba kum kine ki prorkram ai jinghikai.
U la ong ruh lyngba kane ka prokram kin ai jinghikai naduh ki rukom ai jinghikai ban iakhun ia ki examination wad bapher bapher la ka dei ha ka District, state bad wat ha ka National Level bad haba ki la ioh ia ka jinghikai kin tip kumno ban pyndonkam ia ka jingstad khnang ba kin poi sha ka thong kaba ki angnud ha ka jngim.
Lyngba jong kane ka sngi, u la pyntip ruh sha baroh ki samla ka Nongpoh Constituency ba kin shim kabu ia kane ka prorkam ai jinghikai la ka long ha ka liang ka wad kam wad jam ha ki tnad sorkar, ka seng kam seng jam lajong bad kiwei kiwei, kin sa ioh jinghikai ha kane ka prokram ba la wan rah kyrpang ryngkat ka jingiatrei lang bad ka El Elyon Institute Nongpoh.
U la iathuh ruh ba kane ka prokram ai jinghikai kan sdang mynta u bnai bad kin don haduh 15 tylli ki rukom ai jinghikai bad kin pyndep tang hapoh 2 bnai bad ki samla kiba don mynsiem ban ioh jingmyntoi ki dei ban wan ai kyrteng khnang ban lah ban ioh bynta ha kane ka prokram ai jinghikai.
Ha kawei pat ka bynta u la pynshai ruh ba na ka bynta ki samla ki bym iohlad ban rung ha katei ka prokram ai jinghikai, u MLA bad katei ka institute ki la rai ruh ban rah ïa katei ka prokram sha 11 tylli ki shnong ban long kum ki Center ha Nongpoh Constituency bad ha kine ki jaka ai jinghikai ruh kin ai lang kajuh ka jinghikai ban pynshlur ia ki samla ba kin wan shakhmat ban ia khun na ka bynta ka lawei ba phyrnai jongki, u la bynrap.
