U Rangbah Shnong ka Shnong Nongspung B. mynta ka sngi u la mih pyrthei ban pyrshai ba ka jingtih khyndew ha uwei u lum ba hap ha ka shnong Nongspung B, ka dei ka jingtih khyndew kaba beain bad kaba ym pat ioh jingbit ne NOC na ka shnong bad ki paidbah nonghsong shnong kim don jingtip satia.
Halor kane ka jingtih khyndew na utie u lum, haduh 5 tylli ki longing ki la shah ktah, ha kaba la ka jingtuid ktieh bad shyiap na katei ka jingtih lum ka la pynjulor ia ki ing ki sem bad ruh ki jingthung jingtep kaba la long ka jingduhnong kaba kharaw ia kitei ki longing.
Halor kane ka jingshah ktah ruh ki ar tylli ki sengbhalang ki la leit ban tuklar ba kynthup ia ka HCY Ri Bhoi bad ka MPSO, kiba la dawa na u trai ba dei ban siew ia katei ka jingshah pynjot ki ing ki sem bad ruh ki jingthung jingtep ha kaba la kynnoh ba kane ka jingtih khyndew ka dei kaba la leh da uwei u riew shimet ba la tip kyrteng kum u Donald Srinate, uba dei na ka jaid bynriew Naga.
Haba kren halor kane ka jingshah ktah kitei ki longing, u Rangbah Shnong ka Shnong Nongspung B, u Bah Philimon Tongper u la ong ba ka shnong kam don jingtip satia halor kane ka jingtih khyndew bad kum ka shnong ruh kam pat ai kano kano ka NOC ban tih khyndew bad ia kane la sakhi ba baroh ki paidbah nonghsong shnong kim don satia ia kata ka jingtip halor kane ka kam tih khyndew.
U la ong ruh naduh ba sdang ban tih khyndew ki paidbah nongshong shnong kim tip satia kane ka kam tih khyndew bad dei hadien ba la wad jingtip ba ia kane ka kam tih khyndew la leh da uwei u briew uba dei na ka jaid bynriew Naga.
Shuh shuh u la iathuh ruh ba u trai jong katei ka jaka um dei u ba shong ba sah hapoh ka shnong Nongsbung B bad u dei uba shu wan ban thied ia katei ka jaka khlem jingtip naka shnong bad ban tih beain ruh ia utei u lum haduh ba la wan rah pynban iaka jingjynjar ia ki Longiing jong katei ka shnong.
