U Vice-President jong ka Meghalaya Cricket Association, u Bah Rayonald Kharkamni, u la shah thung kum u BCCI Match Observer na bynta ka jingïalehkai Test kaba lai hapdeng ka India bad ka New Zealand ha Mumbai, kaba sdang naduh ka 1 tarik Naiwieng.
U Bah Kharkamni uba dei ruh u President jong ka Ri-Bhoi District Cricket Association, u dei u la don bynta shibun ban kyntiew ïaka kam ïalehkai kriket haka district bad kumjuh ruh haka jylla bad kam jong kitei ki Match Observer ka long ban pynkhreh ïaki kaiphod jong ki jaka ïalehkai, ki umpire bad ki nonglehkai bad kiwei kiwei.
Ka jingleit tour jong ka kynhun New Zealand sha India kan sdang da ka jinglehkai Test kaba nyngkong ha Bengaluru ka ban long ha ka sngi Balang, nangta ka Test kaba ar kan long naduh ka 24 tarik Risaw ha Pune, bad ka Test kaba lai kan long naduh ka 1 tarik Naiwieng ha Mumbai, ïa kane la pyntip da u Bah Gideon Kharkongor, Honorary Secretary MCA.
