Ki shipai jong ka ri Israel ha ka jigpyllait khubor mynta ka sngi lyngba ka rynsan X kaba la tip mynshwa kum ka Twitter, ki la pyntip ba ki dang pynlong ia ka jingtohkit halor jingkhlad jong ki lai ngut ki lehnoh na ka jingshah ther bom ha Gaza, ha kaba la suba ba uwei na kitei ki lai ngut udei u nongialam jong ka seng lehnoh Hamas, u Yahya Sinwar.
Katkum ki dur ki dar kiba la shaphriang ha ki rynsan Social Media, la iohi ia ka dur jong uwei u lehnoh uba la shah pyniap ha katei ka jingshah ther bom kaba iasyriem thik bad utei u Yahya Sinwar, uba dei u nongthawbuit bad pynkhreh ia ka jinghiar thma pyrshah ia ki paidbah ka ri Israel ha ka 7 tarik jong u bnai Risaw, 2023 ha kaba palat 1200 ngut ki nong Israel kynthup naduh ki khynnah rit, ki longkmie, ki ‘riew tymmen ki la shah pyniap dusmon.
Na ka liang jong ki shipai ka ri Israel ki la shimti noh ia katei ka met jong utei u lehnoh ban pynlong ia ka jingleh nongmuna ban lapdien la udei shisha ne em u Yahya Sinwar. La iathuh ruh ba ha katei ka jingther bom ia utei u nongialam ki lehnoh Hamas ryngkat bad ar ngut kiwei de, ym shym la don satia ki nongshah rahbor bad naka liang jong ki shipai Israel ki dang pynlong beit ia ka jingiakhun pyrshah ia ki lehnoh ha katei ka jaka da ka jingphikir ba kan nym don kano kano ka jingshah ngat jong ki nong Israel kiba la shah rahbor naduh mynshem snem ha ka jinghiar thma ba kynsan jong kitei ki lehnoh Hamas.
Kumba long mynta, kane ka thma hapdeng ki lehnoh Hamas bad Israel ka la nang pur shuh shuh sha kiwei de ki bynta jong ka thain Middle East ha kaba ki shipai Israel ki la nang pynjur ia ka jingtherbom bad hiar thma pyrshah ia ki lehnoh Hezbollah jong ka ri Lebanon ryngkat ka jingther bom ia kiwei kiwei de ki lehnoh kiba la bei tyngka da ka ri Iran kiba don kum ha ka ri Syria, Yemen bad Iraq ia kiba la tip kum kita ki Axis of Resistance.
