Nongpoh, Risaw 19: Da ki phew ngut ki khun samla ka Ri Bhoi District mynta ka sngi ki la shim bynta shirthem ha ka ‘Fit India Swacchta Freedom Run’ ba la pynlong da ka ophis u District Sport Officer ka Ri Bhoi ha ryngkat ka jingiatrei lang bad ka ophis u Deputy Commissioner ka Ri Bhoi.
Kane ka jingiamareh thong ka dei ha ka jingjngai kaba 5.0 km, ha kaba ki khun samla kynthei bad shynrang ki la shim bynta kum kawei ka thong ban ia beh ia ka koit ka khiah katkum ka jingangnud ka sorka India.
Kane ka jingiamareh ka sdang na Rishad Sngi Orchid Resort bad pynkut pat ha Meghalaya State Fisheries Research & Training Institute, Mawpun Kshaid, ha kaba la wan ban kaweng lama da u MLA ka Umroi Constituency u Bah Damanbait Lamare ha ka jingdon ryngkat u District Sports Officer ka Ri Bhoi, u Bah Bobby L Nongbet lem bad kiwei kiwei.
Ha kane ka sngi, kum ka jingpynshlur ia ki nongiashim bynta ka ophis u DSO Ri Bhoi ka la sam ruh ia ki khusnam sha ki nongjop ha ki kyrdan bapher bapher.
Kumba la pynbna ki nongjop ha kane ka sngi, na ka liang ki shynrang la rah da usamla Skhemlang Suba, u samla Monas Bongrung uba la wan ha ka kyrdan ba ar bad u samla Jemon Makri ha ka kyrdan ba lai bad haba phai pat sha ka liang ki kyntheiia ka kyrdan ba nyngkong la ioh da ka samla Filinza Hansapi, ka samla Julina Bongrung ha ka kyrdan ba ar bad ka samla Rinalis Ingty ha ka kyrdan ba lai katba ia ka khunsnam ba kyrpang na ka bynta ki kynthei kiba la heh ka rta, la ioh rah da ka Kong Edwina Nongrum.
