Mawthadraishan: Kum u Myntri ba dei khmih ia ka tnad Tourism ka sorkar jylla, u Bah Payl Lyngdoh ha ka 18 tarik u Risaw 2024 u la leit ban buh ia u mawnongrim ban shna ia ka surok ban khring ia ki nongjngohkai pyrthei ba kin poi sha u syntai lum ba la tip kum ka Laitmurok Markham Viewpoint, kaba hap ha Mawthadraishan C&Rd Block.
La sakhi lang ruh ha kane ka sngi ba la buh mawnongrim, da ka jingiadon lang u MLA ka thain bad uba dei ruh u Myntri ka tnad Sport u Bah Shakliar Wajri kum u symbut kongsan bad ryngkat ka jingdon lang ki heh ophisar ka District, ki rangbah shnong, ki nongkitkam ka kur Lyngdoh Nonglait, ki nonghkai, ki khynnah skhl bad kiwei kiba kiba la shah khot sngewbha.
Haba kren ha kane ka sngi kum u kongsan, u Bah Pual Lyngdoh u la ai khublei kyrpang ia ka Kur Lyngdoh Nonglait, kiba la long kita kiba kylluid mynsiem ban ai ia ka jaka na ka bynta ban kyntiew ia katei ka dong bad ka thain ha ki kam jngohkai pyrthei. Ha kajuh ka por u la pynbna ruh ba ka sorkar jylla ryngkat ka tnad Tourism ki la dep ban mang ia ka song pisa kaba 2 klur tam na ka bynta ban shna pynbha ia katei ka surok khnang ban khring shuh shuh ia ki nongjngohkai pyrthei ban poi halor u syntai lum.
Shuh shuh, u Bah Paul Lyngdoh lyngba jong kane ka sngi, u la pynbna ruh ban pynbha ia ka surok ba pyniasoh sha Sohiong shaduh sha Pariong, ha kaba la dep ban mang tyngka 25 klur lyngba ka skhim PMGSY.
