Nongpoh, Risaw 19: Ka jingïaseng shongshit ba 2 sngi lynter jong ka Seng Kynthei Katholik Nongpoh Parish kala sdang mynta ka sngi ha Balang Shnong Nartap halor ka phang “to iai ap bad to duwai ba phin ym liat haka jingpynshoi, ka mynsiem ka kloi shisha ka doh pat ka tlot”.
Ïa katei ka jingïaseng ba ar sngi lynter la wan ban plie da u Bah Rocky Marwein kum u kongsan haka jingdonlang u Fr. Peter Syiemlieh Parish Priest ka Nongpoh Parish, ka kong Meristela Lamare President ka Seng Kynthei Katholik Nongpoh Parish, ki Rangbah Balang, ki sister lem bad ki spah ngut ki longkmie na ki Sub District bapher bapher ka Nongpoh Parish.
Haba kren ha katei ka sngi naka liang u Bah Rocky Marweiñ kum u kongsan u la pynpaw ba ki longkmie ki dei ki nongsaiñdur ïaka iing ka sem bad ka imlang ka sahlang, bad kumba ka phang jong katei ka jingïaseng ka kren halor ki jingpynshoi bad ka jingtlot ka doh ban mane bad shakri ïa u Trai watla ka mynsiem ka thrang ka dei namar ba bunsien ki briew ki klet ban buh ïa u Blei hakhmat, haki kam ki jam ba man ka sngi bad ki klet ban ainguh bad ïaroh ïaki jingkyrkhu jong u ba man ka sngi.
Kum uwei naki samla rangbah ka them Ri-Bhoi u Bah Rocky u la kyntu ruh ïaki longkmie nalor ka jingshakri ba rhem mynsiem jong ki ha u Blei kin long ruh ki nongri nongsumar bad nongsaiñdur ïaka iing ka sem, ki khun ki kti bad ka imlang ka sahlang namar ka kynthei bad ka longkmie kaba stad ka tei ïaka iing, hynrei ka longkmie ka bym sngewthuh ka pynjot thiaw.
