Shillong, Risaw 19: Ka Myntri ka tnat ka koit ka khiah ka Kong Ampareen Lyngdoh ka la pyntip baka Kynhun Myntri Sorkar kan nym pat shah iaka University of Science and Technology (USTM) RI-Bhoi district ban sdang noh ia ka PA Sangma International Medical College kat bym pat don ka Act (ain).
Ïa kane ka rai, la shim haka jingïalang ka Kynhun Myntri ka Sorkar Jylla hynne ka sngi ka 18 tarik Risaw 2024.
“Ka Kynhun Myntri ka la rai ban ym ailad ia ka USTM ban sdang pyntreikam iaka PA Sangma International Medical College khlem ka Act (ain) namar ka ka Sorkar ka hap iaid katkum ka ain hashuwa ban shah iaki skulbah riewshimet ban sdang iaki Medical College” la ong ka Kong Ampareen.
Ka Kong Ampareen kala ong ba ka jingdon jong ka Act (Ain) kan aibor iaka Sorkar Jylla ban buddien ia ka jingai Seat pule Doctor, bai pule Doctor bad kiwei kiwei de naka bynta ka bha ka miat jong ki samla pule bad ka skulbah baroh kawei.
Kala ong ruh ba ka jingthmu ban wanrah daka Act (Ain) kam mut ba kane ka Act kan treikam ha baroh kawei ka skulbah USTM hynrei kane ka Act kan treikam tang ban sdang noh iaka PA Sangma International Medical College.
“Ki don ki rai jong ka Supreme Court kiba la ai bor lypa ia ki Jylla ban wanrah ia ka Act (ain) shwa ban pyntreikam ia kano kano ka Medical College hala ki Jylla. Kiwei ki Jylla ruh ki bud ïa kane, namar kata ka Meghalaya ruh kan hap ban bud ryntih daka ba wanrah noh daka Act hashuwa ban shah sdang Medical College” kala ong.
Ka Myntri kala pyntip ba ka Sorkar Jylla kan pyrshang katba lah ban pyndep ïa ki rukom treikam hapoh ka por ba la buh ha kaba kut jong u bnai Risaw 2024.
