Nongpoh, Risaw 21: Kiba bun tylli ki shnong kiba ju kynduh jingeh ha ka leit ka wan na ka jingshah iehnoh bein ha ka liang ki surok bad ha kane ka kynti ki la pynpaw ka jingsngewkmen kaba khraw kaba dei hadien ba u MLA ka Mawhati u la shim khia ban ia kren sha ka sorkar na ka bynta ban siang rong ia ki surok kiba ki paidbah ki kynduh mawsiang ha ka leit ka wan.
Kine ki shnong kiba sa suk noh ha ka leit ka wan ki kynthup ia ki shnong ha ha ka thain Umkra, ka thain Mawatari Thaiang, Syntumaw, Pdeng Nongrim, ha kaba shen kin sa ioh noh da ka surok kaba paka. Kane ka surok ban sa siang rong noh ka dei ka surok kaba sdang na ka shnong Umkra ban pyniasoh sha ka surok PMGSY ha ka thain Mawtari Thaiang bad Syntumaw bad ruh ka surok ba pyniasoh sha ka surok Umsawnongbri ban poi shaduh sha Nongpoh. kane ka surok ka jngai kumba 3.62 km ha kaba yn siang rong noh ban suk ki paidbah ha ka leit ka wan.
Halor ka jingthmu ka sorkar ban siang rong noh ia katei ka surok, la pynthikna hi da u Bah Charles Marngar, MLA bad MDC ka Mawhati Constituency, ha ka jngleit jingjurip ha ka 19 tarik u Risaw 2024, ha kaba la ia don lang ki ophisar na ka tnad PWD bad ruh u Contractor uba pyntrei ia kane ka surok.
Haba kren sha ki lad pathai khubor, hadien ka jingjurip ia ka surok, u Bah Charles Marngar MLA ka Mawhati, u la ïathuh ba ïa kane ka surok kin sdang noh ban trei la kumno kumno ha ka taiew ba nyngkong jong u bnai Naiwieng 2024. U la iathuh nalor ka surok Umkra kiwei ki surok kiba donkam ban shna pynbha noh yn sdang noh ban shna ne pynbha ha kine ki khyndait bnai ban wan.
“Kitei ki kiwei ki surok ban sa siang rong noh ki kynthup ka surok Mawrong kaba sdang na ka Shnong Rtiang sha ka Shnong Umkei ha ka jingjngai kaba 16 km, ka surok na Mawlasnai haduh ka Shnong Kdohhati kaba jngai 20 km, ka Surok ka Shnong Pamlatar ka jingjlan 8. Km bad ka Surok na Umlaper shaduh ka Shnong Lymphuid ha ka jingjngai kaba 16. Km ba la pynmang Tyngka lyngba ka Scheme PMGSY” ong u Bah Charles Marngar kum u MLA ka Mawhati Constituency.
Ki Nongïalam Shnong bad katto kane ki Nongshong Shnong ki la sakhi lang ha katei ka jingjurip ïa katei ka surok ha kaba ki la pynpaw ïa ka jingsngewkmen kaba khraw, namar kine ki surok ki ba la angnud da ki paidbah la bun phew snem mynta ki la urlong hadien ba la shimti u Bah Charles Marngar kum u MLA bad MDC ka thain.
Kaba la pynkmen shuh shuh, ka long ba lyngba kane ka surok kan pynsuk shibun bad ka pynjan bhai a ki paidbah ban leit sha Nongpoh na ka bynta ki kam bapher bapher, ha kaba baroh shi katta ki mad jingeh namar ki hap ban leit naduh Mawtari Thaiang sha Sohnidan bad na Sohnidan kin wan poi sha Umsning kaba la kot da ki spah km, la pynpaw kitei ki nongialam Shnong.
