Nongpoh, Risaw 19: Ka Ri Bhoi District Sport Association (RBDSA) mynta ka sngi ka la pynhap pyrda noh ia ka 3rd Division Ri-Bhoi League 2024 ba la pynlong ha Madan ialehkai ka shnong Nongjri. Ka jingiakhun ban ioh rah ia ka nam jop ka long hapdeng ka Mawlyngkhung SC pyrshah ïa ka Mawlyndep SC.
Ha kane ka jingpynhap pyrda noh ia ka 3rd Division Ri Bhoi League la wan ban shim bynta da u Bah Charles Marngar MLA ka Mawhati kum u kongsan bad sakhi lang ruh da ka jingdon lang u Raja Brahma, ADC ka Ri Bhoi kum u symbut kongsan ha ryngkat ka jingdon lang u President ka RBDSA u Bah R.B Shadap lem bad kiwei kiwei ki nongialam bad ki riew rangbah ka Ri Bhoi District.
Kumba la sakhi ha kane ka sngi, ka jingiakhun ban ioh khur ia nam jop jong kane ka lympung kala long kaba khluid bad shongshit bha, namar ki kynhun kiba la rung sha ka thup ka phainal ki la iakhun tyngeh ban ioh rah ia ka nam jop jong kane ka lympung ialehkai phutbol ka RBDSA
Ha ka liang ka kynhun ki shynrang ka Mawlyngkhung SC ka la ioh rah ia ka nam jop da kaba ka pynliem noh ia ka Mawlyndep SC da 4-2 kaba dei lyngba ka jingiashut tie breaker. Ha ka liang ki kynthei pat ka Narympei Football Academy ka la ioh khur ia nam jop hadien ba ka la pynliem noh ia ka Pahamsyiem da 2-0 kol.
Ki bor pynïaid ka RBDSA ha kane ka sngi kila sam ruh ïaki khusnam sha ki nongjop bad kumjuh ruh sha kiba rem da ka trophy bad ka song pisa ryngkat kiwei kiwei ki khusnam shimet.
