Nongpoh, Jylliew 05: Ka shlem ai jinghikai ïaki samla pule Nurse ka St. Joseph Academy School of Nursing Umtrew mynta ka sngi kala shim bynta haka jingrakhe ïaka sngi pynneh mariang ne ka World Environment Day da kaba thung dieng ha surok bah National Highway 6.
Shuwa katei ka jingthung dieng la pynlong ruh ïaka prokram lyngkot ha auditorium jong katei ka shlem pule bad thang ruh ïaka sharak ryngkat ka jingbam smai ban pynneh pynsha ïaka mei mariang bala wan ruh ban shim bynta da u Bah AL Hek myntri ka tnad Animal Husbandry bad Veterinary kum u kongsan haka jingdonlang ka kong Ibanrilin Ranee Principal, Jolene Nongkynrih Vice Principal, Sterly Diengdoh Rangbah Shnong Umtrew ki samla pule bad kiwei kiwei ki riew rangbah.
Haba kren ha katei ka sngi naka liang u Bah AL Hek kum u kongsan u la ong ba ka jingrakhe ïaka sngi pynneh mariang ka long kaba donkam bad kongsan ban ai ka jinghikai sha ki paidbah kumba ki briew ki dei ki nongpynjot ïaka mei mariang bad dei u briew ban hap ban shim ruh ka jingkitkhlieh ban sumar bad ban pynbha pat ïaka.
RAKHE KA ST. JOSEPH ACADEMY NURSING ÏAKA WORLD ENVIRONMENT DAY
