Mynta ka sngi ha ka por 2 baje eiei nohphai sngi, ki Pulit Ri Bhoi ki la ioh ban kem ia 4
ngut ki briew kiba kam ialade ba ki dei ki dkhot na ka kynhun sengbhalang Hynniewtrep
National United Federation (HNUF), haba kaba ki Pulit ki la kem ia ki ha ka por ba ki dang
thmu ban leit shim pisa na kawei ka Dhaba kaba don ha Ri Bhoi, ba ki la dep dawa lypa
ha ka kyrteng ban pynmih pisa na bynta ka seng kaba ma ki, ki long kum ki dkhot ka
seng.
Ka tyllong khubor na ki Pulit, la ong ba halor ka jingshah kem ia kitei ki 4 ngut, ka long ba
ha kaba nyngkong, ki Pulit ki la ioh shwa ban kem ia 3 ngut bad kiba la tip kyrteng kum u
Alton Wahlang, u Francis Wahlang bad u Simon Jyrwa, ha kaba la kem ia ki ha ka por ba
ki thmu ban shim pisa na u Manager jong kawei ka Dhaba, kaba ki la leit ban dawa.
Ki Pulit Ri Bhoi, haba ki la ioh ban kem ia kitei ki 3 ngut, ki la tohkit ia kitei kiba la shah
kem bad ha ka jingtohkit ki Pulit, ki la phla ba ia katei ka kam ban leit dawa pisa bad ban
shim pisa na katei ka Dhaba, la bthah da uwei u briew uba la tip kyrteng kum u
Rangsngur Warjri, uba kam ruh ialade ba u dei u President ka Meghalaya People
Federation (MPF) bad kum u President ka HNUF.
Na kaba phla jong kitei kiba la shah kem, ki Pulit ki la leit ban wad sa ia u Rangsngur
Warjri, ia kaba ki la ioh ban kem noh ia u na ki thain Umsning.
Haba iadei bad katei ka jingshah ia kitei ki 4 ngut, ki Pulit kiba la don ia ki sakhi satar kiba
biang, ki la ujor da ka Suo moto case bad kiba la rejister case ha Nongpoh Police Station,
nalorkata kin dang pynlong ia ka jingtohkit kaba bniah bha halor katei ka kam leit dawa
pisa.
Ki Pulit, ka iathuh ba u trai bad u Manager jong ka Dhaba kim shym la nud ba ujor ejahar
pyrshah ia kitei ki briew kiba la leit ban dawa pisa, namar ba ki sheptieng ba ki dei ki
khynnah Khasi bad ruh ban lait na kino kino ki kynrum kynram.
HA SHRIP KI PULIT RI BHOI, NGAT 4 NGUT KIBA LA LEIT DAWA PISA NA DHABA HA KYRTENG KYNHUN SENGBHALANG
