Mawkynrew, Risaw 22: Ki nongshong shnong ka Umsning hapoh ka Mawkynrew C&RD block ha ka 21 tarik u Risaw 2024, ki la leit ban kynduh ia u Executive Engineer ka tnat MeCEL ha Lumshai ban buh ia ka jingujor halor ka jingbym don ka bording kaba biang mynta la 5 bnai tam tang namar ka jingsniew u transformer u ba la buh ha kane ka shnong ha kaba ki paidbah ki la hap ban shongdum da ki bnai.
La synranlang ruh ia ki nongshong shnong ka Umsning, da ki nongialam ka FKJGP, Mawkynrew ba la lamkhmat da u Bah S Masking bad ki dkhot ki la leit ban buh ia ka jingujor halor ka jingeh ba la mad da u paidbah ba ki la hap ban shong dum ha ka shnong Umsning.
U wei na ki nongshong shnong, u iathuh, ba watla ki paidbah kane ka shnong hapoh Mawkynrew ki la mad ia kane ka jingeh mynta la 5 bnai tam, hynrei na ka liang u MLA ka thaiñ um shem la patiaw satia hynrei ban shu kut tang ha ki jingkular watla ki paidbah ki dep ban ud ha u ia kane ka jingeh.
Na ka liang u Bah S Masking, haba kren bad ki Nongthoh Khubor, u la pynpaw ba ka seng ka dap da ka jingsngewkhia kaba jur ban tip ia kane ka jingeh ba la mad da ki paidbah ka shnong Umsning hapoh Mawkynrew block mynta la san bnai eiei namar ka jingthut u transformer kumta na ka liang ka seng ka la shimkhia ban wan mih sha Shillong ban ia kynduh ia u EE ka tnad MeCEL ban wan kyrpad na u ban shimkhia halor kane ka jingeh ba la mad da ki paidbah.
U la iathuh ruh, ba ka seng ka dap ruh da ka jinglyngngoh halor ka jingsngap mynthi da u MLA ka thain watla ki paidbah ki la dep ban kyrpad na u ban shimkhia halor kane ka jingeh ba ki la mad mynta la san bnai, kane ka paw ba kum u MLA um don ka jingkitkhlieh ia la ki paidbah.
Shuh shuh ruh, ka FKJGP lem bad ki paidbah ki la pynpaw pat ia ka jingsngewkmen hadien ka jingiakynduh ia u EE ka tnad MeCEL u ba la kular ban shimkhia ia ka jingeh jong ki da kaba yn pynpoi noh ia u transformer ba thymmai hapoh 2 ne 3 sngi ha ka shnong Umsning hapoh Mawkynrew Block.
