Shibynta ban iarap bad ban kyntiew ia ka ioh ka kot ha ki nongrep, kata ka long ban nangkyntiew ia ka kam rep kam riang ha ki jhur kiba laiphewjait, ka Dalmia Bharat Foundation (DBF), lyngba ka Corporate Social Responsibility (CSR) jong ka Dalmia Cement (Bharat) Ltd (DCBL), ki la pynbna bad ki la pyllait paidbah ia kawei ka prokram, ia kaba la tip kum ka ‘Kitchen Garden’ bad ha katei ka sngi, ba ki la pyllait paidbah ia katei ka prokram, ki la lah ruh ban sam symbai jhur, kiba kynthup ia ki symbai Kajor, Muli, Tyrso, Dhania lem bad kiwei ki jait symbai sha ki 124 tylli ki longing na ki 9 tylli ki shnong East Jaintia Hills.
Katei ka prokram kaba la pyllait paidbah da ka DBF, ka kynthup ruh ha ka ban ai jinghikai sha ki nongrep, ba kin rep katkum ka juk stad ba mynta, khnang ba kan long shisha ka jingmyntoi na bynta ki nongrep, ba kin kiew ha ka ioh ka kot, na ka pisa ba ki ioh haba ki la die ia ki rep rep kiba ki la rep la riang.
U Raju Ranjan Prasad, Unit Head ka Meghalaya, DCBL, u la ong ba ka jingthmu jong ki ban pyllait paidbah ia katei ka thong kaba ki don, ka long ban kyntiew ha ka ioh ka kot ia kito ki shnong kiba don ha Nongkyndong bad khamtam eh ia ki nongrep, ba kumno kin nanglah shuh shuh ban kyntiew ia ka kam rep kam riang jong ki, khamtam eh ban pyndap pynbiang ia ka iing ka sem.
Shuh shuh, u la ong ruh ba lyngba katei ka prokram, ki don ruh ka jingthmu ban kyntiew ia ka ioh ka kot sha haba iadei bad ki longkmie, namar ba ki longkmie ki dei kiba kyrshan eh ia ka iing ka sem.
Lyngba jong katei ka sngi, kaba dei ruh ka sngi ba ki la sam symbai jhur bad ruh ban ai jinghikai sha ki nongrep kaba la long ha shnong Sonapyrdi, la sakhi da ka jingdon ki rangbah shnong, ki riew rangbah bad ki longkmie.
