Ban kyntiew ia ka jingiadei kaba jan bad ban wanrah ia ka jingiatylli, na ka liang ki bor sorkar ka jylla Mizoram bad Nagaland ki la pynlong da ka prokram ba la tip kum ka Bharat Ko Jano kaba long ruh ban kyntiew ia ki kolshor ban tip kham bha ruh ia ki tynrai ki kolshor jong kiwei kiwei ki jylla ka ri India.
Ia kane ka prokram kaba la long ha khappud jong ki ar jylla la pynlong da ka North East Zone Cultural Centre (NEZCC), Dimapur, Ministry of Culture, Govt. of India bad ka Art & Culture Department, Govt. of Mizoram
Ia kane ka prokram la wan ban shimbynta da u Lat ka jylla Mizoram u Dr. Hari Babu Kambhampati kum u kongsan, katba u Lat ka jylla Nagaland u La. Ganesan u ba dei ruh u Chairman ka NEZCC kum u Symbut kongsan.
Haba kren kum u kongsan, u Lat ka Mizoram u Dr. Hari Babu Kambhampati u la ai khublei kyrpang shwa ia u Lat ka jylla Nagaland u La. Ganesan, kum u Chairman NEZCC kiba la shimkhia ban pynlong ia kum kane ka prokram Bharat ko Jano ha khappud ka jylla Nagaland bad Mizoram da ka mynsiem ban wanrah ia ka jingiatylli ban pynneh pynsah ia ka jingsuk ha ki khappud khamtam ruh kum ki jylla kiba marjan bad ka Assam.
Ha kaba u la pynpaw ruh, ia ka jingkmen halor ka jingkitkhlieh da ki nongshong shnong ka sor Vairengte kiba iai pynneh ia ka mynsiem jinglong shipara, ka jingiatylli kum ki nong India, da kaba bynrap, ba ki nongshong shnong ha ki khappud ki long kum kita ki nongrah dongmusa ban pynsawa ia jinglong kyrpang ba bat da ka Mizoram na bynta ka jingsuk, ka jinglong shisur bad ka jingkloi ban iarap markylliang.
U Lat ka Mizoram, u la kyntu ruh ha kane ka jingialang, ban pynkhlaiñ shuh shuh ia ka Bharat Ko Jano campaign ban pynsngewthuh kham bun shaphang ka ri, ka jingtip ia ki kolshor, bad ban sngew sarong ia la ka jinglong tynrai khamtam ban burom ia ka jong kiwei ruh da kaba kdew ruh, ba ha North East ki don kumba 200 tyllinko Jaidbynriew (Ethnic Communities) bad kumba 220 tylli ki kyntien ba ia kren kumta ka cultural exchange program ka long kaba kongsan ban pynkhlaiñ ia ka jingiadei jong ngi.
U la ai ruh ia ka jingiaroh ia ka NEZCC, Art & Culture Department, Kolasib District Administration bad ki kynhun ba shimbynta ban pyni ia ki jingshad tynrai, ki riam ki beit kiba na Mizoram, Assam, Tripura bad Bihar kiba pyniphuh iphieng ia kane ka program, u ka pynkynmaw ruh ba ka India ka dei kaba wan ba 5 ha kum ka ri kaba biang ha ka ioh ka kot (largest economy) ha ka pyrthei bad kumba angnud da u Myntri Rangbah duh ka Ri u Narendra Modi ban pynlong ia ka ri kaba khlaiñ ha ka roi ka par lyngba ka Viksit Bharat hapoh ka 2047 kumta ki paidbah ki dei ban pyndonkam hok ia ki skhim ba la mang da ka sorkar India.
La ioh jingkren ruh, na u Lat ka jylla Nagaland u La. Ganesan u la ong, ba kam pher la ki paidbah ki wan nangno nangno ruh namar ki dei hi ki nongshong shnong ka ri India kaba donkam eh ka long ka jinglong iatylli ban kiar na ka jingsngew ia pher jylla namar kum ka North East ka dei kawei na ki thaiñ kaba kongsan bha ha ka ri hi baroh kawei.
Ha kane ka program Bharat Ko Janoz la ia shimbynta ruh u Dr. Prashanna Gogoi, Director ka NEZCC, u DC ka Kolasib Pu Robert C. Lalhmangaiha, u Sr. SP Kolasib u Pu David H. Lalthangliana.
La pynphuh pynphieng ia kane ka program da ki nongtem nongput bad nongshad tynrai na Mizoram, Assam, Tripura bad Bihar.
