Nongpoh, Risaw 28: Ka long kaei kaei kaba phylla bad ba ki paidbah nongshong shnong kim poi pyrkhat satia, ha kaba ki kynja han ba phylla ki la wan poi da ki hajar tylli ha kawei na ka shnong ha Ri Bhoi, ha ka por shiteng synñia tad haduh ba ba la pynduh thiah pynduh dem ia ki paidbah nongshong shnong na ka daw ka jingpah kitei ki han kiba her ha ki sahit bneng.
Kane ka shnong ba la wan poi kitei ki han ba phylla, ka dei ha ka shnong Klew ba hap ha ka Raid Madan Kyrdem ha Ri Bhoi District. La ong ba ha ha ka por shiteng synnia jong ka miet 25 tarik kitei ki han ki la wan poi ha katei ka shnong ba ki shu her ha ki sahit bneng bad ha kane ka jingwan poi kitei ki han ba phylla ka la pynkhihwin ia ki paidbah nongshong shnong wat la ka dei ha ka por shiteng synñia.
Kumba la ioh ban ia kren bad u Rangbah Shnong ka Klew, u Bah Lamburom Masharing, u la ong ba ki paidbah kim poi pyrkhat ia kane ka jingwan poi ki han kiba her ha sahit bneng, hynrei ka daw kaba ki paidbah ki la ioh jingtip ka dei namar ba ki kitei ki han ki la shu pah beit khlem sangeh haduh ba ki paidbah kim nang shuh ban thiah ban dem bad ka la pynlong ruh ia ki ban mih shabar ban sakhi ia kane ka jingwan poi kitei ki han ba phylla.
U la ong ruh ha kane ka jingwan poi kitei ki han, la pynthikna da ka jinghap kawei na kitei ki han ha ka pynthor kba, kaba la sahkut noh bad khlem da lah shuh ban her biang, hynrei la leit ban pynlait im noh da uwei na u rangbah ba la tip kyrteng kum u Bah Adrinshon Sohiong, uba la leit ban kem na katei ka pynthor kba hadien ka jingiohsngew ba katei ka han ka la shu pah beit bad sahkut ha pynthor kba khlem da lah shuh ban het biang sha sahit bneng.
La ong ruh wat la ki la wan poi da ki hajar tylli, hynrei kiwei kiwei ki leit phai biang, hynrei tang katei kawei ka hank aba la sahkut bad kaba la ioh ban pynlait im da utei u rangbah, uba la pyntip ruh sha ki bor shnong ka shnong klew.
U Bah Masharing u la ong ruh ba ka shnong ka la maham ia baroh ki paidbah nongshong shnong ba kim dei ban pyniap ne pynmynsaw lada lap ia kiwei ki han ha katei ka jingwan poi ha katei ka shnong bad ia katei kaba la ioh kem da u rangbah ruh la sumar bha ban buh ha ka sem ba kyrpang bad ka rai jong ka shnong ka long ban leit aiti ia katei ka han ba la ioh kem sha ka tnad Wildlife ban leh katkum ki kyndon jong ka sorkar.
