Ka Ayurveda ka dei ka rukom ai jingsumar kaba rim bha jong ka ri India, kaba la sdang kumba 5000 snem mynshuwa. Ayurveda ka dei ka kyntien Sanskrit kaba kynthup ia ka kyntien Ayur kaba mut ka jingim bad ka kyntien Veda kaba mut ka jingstad, kyllum lang kaba mut Ka jingstad bad ka jingtip ha ka iadei bad ka rukom im ka jong u briew. Ka Ayurveda ka thmu ia kaban wanrah ia ka koit ka khiah ym tang da ki dawai hynrei da ki lad iada kiba iadei bad ka bam ka dih, ka iaid ka ieng, ka jingkylla jong ka mariang, ka rukom thiah rukom dem kumta ter ter. Da kaba bud ia kine ki nongrim jinghikai jong ka Ayurveda ngi lah ban ioh ia ka koit ka khiah kaba pura. Ka Ayurveda ka dei ba ka bynta baroh ki briew kiba kwah ia kum kane ka jingsumar khlem don kano kano ka jingpyniapher halor ka niam, ka jait, ne ka riti dustur, ne ka jaka sah. Ia ki dawai Ayurveda lah ithuh bad pyniaid katkum ki ain ba lah pynbna da ka sorkar kum ka Drugs and Cosmetic Act. Ha kine ki shiphew snem bal ah dep ka sorkar Kmie jong ka ri India ka lah nang ialeh ban warah ia ki doctor bad ki nogtrei Ayurveda kiba tbit khnang ban pyniar bad pynskehm shuh shuh ia ki jingsumar Ayurveda.
Man u snem la rakhe ia ka Ayurveda Day, bad mynta u snem ruh yn rakhie ia ka Ayurveda day kaba khyndai ha u 29 tarik jong u bnai Risaw.
Ha kane ka jylla Meghalaya, ka North Eastern Institute of Ayurveda and Homoeopathy ka dei ka jaka sumar hapoh ka jingkhmih jingpeit jong ka tnad, sorkar India, Ministry of Ayush. Ha ka 28 tarik Lber, 2008, ka kynhun myntri pdeng ha ka jingialang jong ka la ai jingmynjur ban seng ïa ka North Eastern Institute of Ayurveda and Homoeopathy ban ai jingïarap ha ka liang ka koit ka khiah sha ki paidbah jong ka thain Shatei Lammihngi bad Sikkim lyngba ki rukom sumar Ayurveda bad Homoeopathy. Nyngkong, ka shlem ka la pynïaid ïa ka jingtreikam jong ka bad ka OPD (City Center OPD), kaba kynthup ïa Ayurveda bad Homoeopathy, ha kawei ka iing ba la shongwai ha Nongrim Hills, Shillong naduh u bnai Nailar, 2010 ha kaba ki paidbah ki la ioh jingïarap sumar ei bad dawai ei. Ha ka 1 tarik Jylliew 2015, ka shlem ka la sdang ïa ka OPD (Ayurveda bad Homoeopathy) ha la ka jaka jong ka ha Mawdiangdiang, Shillong (hajan NEIGRIHMS).
Ka shlem ka don ïa ka hospital Ayurveda ba don 100 jingthiah bad ka hospital Homoeopathy ba don 50 jingthiah bad ka la ïaid beit ïa ki IPD bad OPD jong ka Ayurveda bad Homoeopathy da ka jingjop kaba khraw, kaba pynïaid da ki doktor kiba tbit ha ki sap kyrpang jong ka Ayurveda bad Homoeopathy. Ki jingai jingsumar ia ki jingpang kiba bun kum ka jingpangmat, jingpang thied, jingpang ba iadei bad ka kpoh, jingpang khniang, jingpang sahiaw, ka jingpang shini, jingpang BP, jingpang khmat, jingpang Migraine, jingpang ba iadei bad ki kynthei, jingpang ba iadei bad ki khyllung. Ka kynthup ruh ia ki lad jingsumar kiba pher bapher kum ka Panchakarma, Yoga, Dentistry, Physiotherapy, Diagnostic Laboratory, Mother and child care Clinic- Homeopathy, Diet Counselling etc.
Ki jingai jingsumar ha ka OPD jong ka hospital Ayurveda ki kynthup ïa ka Panchakarma, Kayachikitsa, Shalya Tantra, Swasthavritta & Yoga, Prasuti Tantra bad Stree Roga, Dentistry, Casualty, bad Minor OT, katba ki jingai jingsumar ha ka OPD jong ka hospital Homoeopathy ki kynthup ïa ka Medicine, Obs & Gynae, Pediatrics, Surgery, Casualty, Minor OT bad kumta ter ter.
Ka shlem ka ai jingshakri ei ha baroh ki OPD bad IPD kynthup ruh ïa ka jingai dawai ei katkum ka jingdon ha ki Pharmacy bad ka jingbam khlem da siew pisa sha ki nongpang ha ki IPD. Ki hospital ki don ïa ki kamra kiba biang pura, Operation Theatre, Yoga Centre, Physiotherapy unit, Panchkarma unit bad kiwei de.
Ha ka snem 2023-2024, ki don baroh 52,858 ki nongpang OPD (37354 Ayurveda + 15,504 Homoeopathy) bad baroh 913 ki nongpang IPD (795 Ayurveda + 118 Homoeopathy) kiba la ioh jingmyntoi na kane ka shlem jingia jingsumar.
Kane ka jaka ai jingsumar ka don ia ka laboratory kaba lah ban pynlong ia ki test bapher ban peit bniah ia ki jingpang bad ban tip ia ki jingpang bapher bapher, ban kyrshan ha ka jingsumar kaba donkam bad ka jingpynkoit ia ki nongpang.”
Ka shlem ka don ruh ka jingpule ba pura da kawei ka College Ayurveda bad kawei ka College Homoeopathy ha Mawdiangdiang, Shillong, naduh u snem 2016 bad ka dei ka college kaba la ithuh da ka North Eastern Hill University (NEHU), Shillong. Ka shlem ka la dep pdiang 8 batch ki khynnah pule ha ki kyrdan BAMS bad BHMS bad ka jingpdiang 50 ngut ki khynnah ha manla ki snem pule 2016-17, 2017-18, 2018-19 bad 63 ngut ki khynnah ha manla ki kyrdan naduh ka snem pule 2019-20 haduh mynta.
Shuh shuh nalor ka jingpynïaid ïa ki kyrdan BAMS bad BHMS,sa kawei ka kyrdan Certificate course ha ka Panchakarma Technician kaba long shi snem pura ka jingpule, ka don kumba 20 ngut ki khynnah man la u snem.”
Ki Khynnah kiba wan pule ki dei na kylleng ki jylla ka ri India. Kine ki jaka pule ki pynkhreh ia ki khynnah katkum ki kyndon kiba pura ban pynioh ia ka jingtip ha ka koit ka khiah kaba iadei bad ka Ayurveda bad ka Homeopathy.
(Dr. Verity Markhap) (Dr. D. Walebai R. Rymbai)
Lecturer (Ayurveda) Lecturer (Ayurveda)
NEIAH, Shillong NEIAH, Shillong
