Nongpoh, Risaw 28: Haba ai jingkren sha ki paidbah ha shnong Tyrso, kaba dei ka sngi ba la plie paidbah ia ka Ginger Processing Unit bad kaba ruh ka sngi ba ka Iakyrshan Cluster Farmer’s Producer Multipurpose Co-operative Society, ka la rakhe ia ka jingdap ba 3 snem snem, u Bah Charles Marngar, MLA Mawhati, u la kren diaw da kaba ong, ba lada ma u kum u MLA um shah kren ne shah kynthoh, kaba mut ba ka Mawhati Constituency ha kine ki 5 snem kan sah hajuh bad kam ioh ia kino kino ki kam pynroi.
Ha ki jingkren jong u Bah Charles Marngar, u la ong ba naduh ba u la long kum u MLA um shym la shong klikti, hynrei u la trei shitom eh bad khamtam eh ba kumno ban wanrah ia ka shongsuk ka shongsain ha khappud bad kaba la ju tip kum ka Block-2 bad haba u pynshai halor halor, u la ong ba u la leit pynlut por ban iakren bad ki heh ka Karbi Anglong Autonomous Council (KAAC), kiba kynthup naduh ia u CEM ka KAAC, nangta ia ki EM ka KAAC lem bad ia kiwei, ha kaba ka jingthum jong u ban leit kynduh, ka long ban wanrah ia ka shongsuk shongsain ha katei ka thain khappud bad ban ym don kano kano ka huri hura hapoh katei ka thain.
“Ban pynshisha halor kata, u la ong ruh ba naduh ka por ba u la ialeh shitom ban leit iakren ia u CEM ne ia ki nongtrei ha ka Karbi Anglong bad mynta phim iohsngew shuh ia ka jingiakynad hapdeng kiba sah ha khappud, ha kaba ki im ha ka shongsuk shongsain, hynrei kaba nga sngew kmen eh ka dei, hadien ba nga la lah ban ai jingiarap ia ki 8 tylli ki skul ha khappud, ia kaba nga la ioh ia ka skim na u Chief Minister kaba la kot sha ka T. 64 lak ia kaba yn sa pyntrei noh shen ia kitei ki skul” ong u Bah Charles Marngar.
Shuh shuh, u la ong ruh ba lada u Bah Charles Marngar um shah kren ne shah kynthoh, ka Konstitwensi kan sah hajuh ha kine ki 5 snem bad haba u pynshai halor kata, u la ong ba ka surok Mawrong kaba don ia ka jingjrong kaba 16km shen yn sa khot tender noh shen, nangta ka surok Lymphuid kaba don 16km ruh yn sa khot tender noh, ka surok sha Pamlatar 8km kaba la sah khongreng mynta da ki phew snem yn sa khot tender noh, ka surok Umtrei kaba la sdang ban siangrong mynta bad kaba yn sa plie noh shen, ka surok na Mawlasnai sha Kdoh-hati kan sa ioh, sa ka surok na Umkra sha Syntu-maw kan sa sdang ban trei noh ha kane ka taiew ban wan, ka Mawhati C&RD Block kan sa plie noh shen bad ka ban pynkmen eh kan dei halor ka surok na Sonidan sha Umsiang ia kaba la pynmang haduh T. 160 klur, kaba sa sdang ha u snem ban wan.
Dei halor kine ki nongrim, kaba la pynlong ianga ba ngan hap ban len ialade na ka bynta ka jingmynta ka jingmyntoi ki paidbah, hynrei ka jingkyrpad kaba nga don, ka long ba ai ba u Bah Charles Marngar ba un sah hi u Bah Charles Marngar, kampher watla u phong da kano kano ka sopti phong, hynrei ha kaba kut hi un long hi u Bah Charles Marngar, u la ong.
Ngan dei hi u Bah Charles Marngar, ngan leit jingiaseng kumba nga ju leit, ngan ieid ia ki paidbah kumba nga ju ieid bad ba ngan trei hi kumba nga la trei bad shakri ia ki paidbah, hynrei kaba nga don ban kyntu ka long ba phin ai beit ka jingiatreilang bad nga ha kine ki sngi ki snem ban wan, pynkut u Bah Charles Marngar.
