Shillong, Risaw 30: Ki ar ngut shi paralok ki la mysaw jur hadien ba ki la hap noh shariat ha Mawiong, hadien ba ka Scooty kaba ki shong ka la syntuid kynsan ha ka surokbah na Shillong sha Guwhati, ha kab ka scooty ka la kylla ha surok katba kitei ki ar ngut pat ki la hap syndon shariat.
Kane ka jingjia ka la jia hynnin ka miet ha ka por 10 baje ei ei mynmiet, ha kaba kitei ki ar ngut shi paralok ki dang wan na ka Scooty ban hiar sha Ri Bhoi District, hynrei kynsan kynsan ym lah ban tip na kaei daw ka Scooty ka la syntuid kynsan sa surok haduh ba utei u nongniah bad uba shong nadien ki la her na ka Scooty bad hap sha katei ka riat ha Mawiong.
Kumba la ioh lum jingtip, la ong ba u nongniah Scooty u la kham mynsaw jur na ka jingkdiah ka kjat bad utei uba shong nadien pat u la shu mynsaw malu mala. Ia kitei ki ar ngut la iarap da ki paidbah ban sei da u Tyllai ban pynpoi biang sha ka surokbah.
Halor kane ka jingjia, ki paidbah ki la pyntip sha ki Ambulance 108 bad ruh sha ki Pulit ka Mawlai ha kaba ki la wan poi sha katei ka jaka bad ha ryngkat ka jingiarap ki paidbah la lah ban sei noh ia kitei ki ar ngut ba hap shariat ba la pynkit noh mardor sha Civil Hospital Shillong ban ioh ia ka jingsumar kaba ki la shah ktah na ka jingmynsaw ba hap ha katei ka riat.
Shuh shuh, la ong ruh ba katei ka Scooty ka dei ka Scooty kaba ym pat don number bad ruh ia ka kyrteng bad ki jaka sah kitei ki ar ngut ym pat ioh lum jingtip satia, ha kaba ka jingtohkit da ki Pulit ka Mawlai Police Station ka dang iaid shakhmat.
