Nongpoh, Risaw 29: Ban bteng ia ka thong ka jingiakhun pyrshah halor ka jingkynrei u drok ha ka jylla katkum ka thong ba la buh ka seng HYC ba la tip kum ka, “ Drugs Elimination and Enforcement of Dream”, ka HYC sengkmie ryngkat ka HYC na Ri Bhoi mynta ka sngi ki la bteng ia ka jingialap pyrshah drok ha Ri Bhoi District.
Na ka liang ka seng ka la pynlong shuwa da ka jingiaid paidbah na madan Pahamsyiem bad pynkut ha Iewmawlong, kaba dei ruh ka sngi Iew Nongpoh, na ka bynta ban pynsngewthuh sha ki paidbah halor ka jingma na ka jingkynrei u drok bad ruh ban pan ka jingkyrshan na ki paidbah ban ia khun pyrsha na ka bynta ban pynduhjaid ia u drok.
Ha kane ka sngi la don lang ruh naduh u President ba rangbah ka seng, u Bah Roykupar Synrem, u Vice President, u Bah Donboklang Kharlyngdoh, u President ka HYC Ri Bhoi, u Bah Hercules Suting, u Editor ka Shillongmail u Bah Kyrmen Uriah, ki nongialam seng na ka MPSO, CORP bad kynthup kiwie kiwei ki riew rangbah bad ki khynnah skul kiba ia shim bynta ha kane ka prokram iakhun pyrshah ia u drok.
Haba kren kum u president ba rangbah ka seng, u Bah Roykupar Synrem u la pynpaw ia ka jingsngewkhia kaba jur halor ka jingkynrei u drok ha ka jylla bad u la kynnoh ruh ba ka seng ka hap ban shim ia kane ka sienjam ka dei namar ba ka sorkar ka leh kuman halor kane ka jingkynrei jong u drok.
U la ong ruh ba ka seng kam kwah satia ba ha u snem 2023 ki nongdih drok ki don 2 lak bad mynta u snem 2024 ki la kiew sha ka 1 lak bad kata 3 lak la poi ki nongdih drok ha ka jylla bad kum ka seng kam kwah ba kane ka jingdon ki nongdih drok kan dang kiew na ka 3 lak bad ka kwah ba ki nongdih drok kin dang hiar ha kane ka jylla.
“Ka seng ka la buh ruh haduh 7 tylli ki mat kiba ia dei bad ka jingiakhun pyrshah ia u drok bad kaba sngewsih ka long ba ka sorkar ka leh mynthi bad wat u myntri rangbah ka jylla ruh ym don por ban ia kynduh bad kane ka pw shai ba ka sorkar kam don ka jingkitkhlieh ban ia khun pyrshah iau Drok” ong u Bah Roykupar Synrem.
Na ka liang ka seng ka pan ia ka jingkyrshan na ki paidbah ban ia khun pyrshah ia kane ka jingkynrei u drok bad ka seng ka la rai ruh ban leit tur noh sha Secretariat ha ka 7 tarik u Naiwieng 2024 ban pyrshah halor ka jingleh kuman ka sorkar ia kitei ki 7 tylli ki mat ba la buh da ka seng bad ha kawei ka bynta u pan ia ka jingkyrshan na ki paidbah ba kin ai ka jingkyrshan kaba pura ia ka seng khnang ba kane ka jingiakhun pyrshah ia ka jingkynrei u drok kan long kaba jop, u la bynrap.
Kiwei kiwei kiba la ai jingkren ha kane sngi ban pynpaw ia ka jingsngewkhia halor ka jingkynrei u drok ha ka jylla ki kynthup ia u Bah Donbok Kharmawphlang, Vice president ka seng, u Bah S. Lyngdoh, Chairman ka Nongpoh Town Committee, u Bah Kyrmenlang Uriah, Editor u Shillongmail bad kiwei kiwei de.
