Hapdeng ka jingiphuh iphieng ki samla pule jong ka Ri-Bhoi College hapoh ka lama jong ka Ri-Bhoi College Student Union (RBCSU), kila pynkut noh ïa ka taiew lehkmen ne ka “College Events 2024” mynta ka sngi. Kane ka taiew lehkmen kaba sdang naduh ka 25 tarik mynta u bnai, halor ka phang “The dreams of today are the realities of tomorrow,” ka la pynlong ïa ki samla pule ban shim bynta shitrhem ha ki jingïakop bad ki prokram bapher bapher.
Ha ka jingpynhap pyrda, u Bah Mayral Born Syiem, MLA ka Nongpoh, u la wan ban long kum u kongsan, bad u Bah RR Makdoh uwei naki dkhot ka Governing Body jong katei ka college kum u symbud kongsan. Haka jingdonlang u EC Benny, Principal jong ka college, ki nonghikai lem bad ki samla pule, kila sakhi lang ïa katei ka sngi.
Ka RBCSU bad ki bor pynïaid jong ka Ri-Bhoi College kila pyndon burom ruh ïa ki riew rangbah kiba la noh synñiang shibun ïaka college naduh ba sdang seng ïa katei ka jaka pule.
Haba kren kum u kongsan, u Bah Mayral ula pynpaw ïa ka jingsngewnguh kaba khraw ban don bynta bad ki samla ha katei ka jingrakhe. U la pynshlur ïa ki samla pule ban phohsniew lem bad ban pynkylla ïa kitei ki phohsniew shaka jingshisha, da kaba ong ruh ba, “Kane ka pyrthei kaba itynnad ka long kum ka duriaw ha kaba uwei pa uwei na phi u long u nongñiah lieng, katno jngai phin leit ka shong ha phi hi.”
