Ka Federation of Khasi Jaiñtia and Garo People (FKJGP) Central Body ka pyrshah jur ïaka jingthmu jong ka sorkar jylla lyngba ka jing pyntip paidbah bala pymnih na ka ophis jong ka Deputy Commissioner, East Khasi Hills District ha ka 30 tarik Risaw 2024 ba yn plie noh ïaka surok na Them Iew Mawlong sha Bimola naduh ka 4 tarik Naiwieng 2024.
Haba phah ïaka kyrwoh naka seng lyngba u Samla Kitboklang Nongphlang Vice President ka FKJGP sengkmie u la pynpaw ba katei ka jingleh jong ka sorkar kadei tang ka buit ban pynthame ïa ki paidbah nong shong shnong jong ka Bri u Hynñiewtrep ban pynslem shuh shuh ïa ka jing pynkynriah noh ïa ki briew kiba sah be-aiñ ha Them Iew Mawlong. Ki paidbah jong ka Bri u Hynñiewtrep da ki phew snem na ka por sha ka por kila pynpaw ba la donkam ban pynkynriah noh mardor ïa ki briew kiba sah be-aiñ ha Them Iew Mawlong bad kila iai shah ruh haduh hynriew snem kynthih naduh u snem 2018 hadien bala khangdam ïa katei ka surok na ka daw ba la mih ka jingïakynad hapdeng ki samla khasi bad ki poiwir kiba sah kiba sah be-aiñ ha Them Iew Mawlong.
Lyngba ka kyrwoh ka seng kala pynpaw ruh ba kam lah ban klet ba ki jing jia shah bom shah tied, ki jing shah lute, ka jing shah leh kynshleiñ bad shah leh khlem akor jong ki samla kynthei bad longkmie Khasi ha kitei ki jaka kiba ju jia na ka por sha ka por namar ba kitei ki briew kiba sah be-aiñ ha katei ka jaka ki ioh leh thik kum ki khun khatduh jong ka sorkar jylla naduh ki por kiba mynshwa ha kaba wat kita ki bor jong aiñ ruh lada don kino kino ki jing jia ha kitei ki jaka ki ju ai jingïada pynban ïa kitei ki poiwir kiba shong ba sah be-aiñ katba ïa ki trai ri trai muluk kiba dei ki khasi pat ki kylla long ki langkñia. Wat hadien bala khangdam ïa katei ka surok na Them Iew Mawlong sha Bimola hapdeng kine ki Hynriew snem ruh la sakhi ïa kiba bun ki kam bymman kynthup ruh iaka jingioh kem ïaki nong dih bad khaii drok bad kumta ter ter.
Ka jingpynbna paidbah bala pynmih da ka sorkar jylla lyngba ka ophis jong ka Deputy Commissioner, East Khasi Hills District ha ka 30 tarik Risaw 2024 kadei kaba don jingïadei aiu re aiu sha lyndet. Kum ka seng kam lah satia ban pdiang ba ha katei ka jing pyntip paidbah ban kdew shai lane ban pyn donkam da ka kyntien ‘Punjabi Lane’ ha ka jaka ban kdew lane thoh ‘Them Iew Mawlong’.
Ka Seng FKJGP ka buh ruh ka jing kylli ïa ka sorkar ba hato katei ka jing pynmih ïa katei ka kyntien kadei pynban ka jinglehkhnang ban pynskhem ïa ka jing long trai jong kitei poiwir kiba shong ba sah be-aiñ ha katei ka jaka? Ka seng ha kajuh ka por ka maham jur ïaka Sorkar jylla ba kadei ban shim ïaka jingkitkhlieh lada mih biang kino kino ki kynrum kynram bad ha kajuh ka por ka seng ka kyntu jur ïa ka Sorkar ba kam dei satia ban pyn sngap ïa ka jing pyrshang ban tuklar bad mushlia da ki briew kiba na kiwei pat ki jylla ki bym tip satia ïa ka dang ka duh hynrei ba ka dei ban ïaid beit shakhmat ïaka jing pynkynriah ïa kitei ki briew kiba shong ba sah be-aiñ ha Them Iew Mawlong.
Ka seng hi ka sngew ba ka jing aidaw jong ka sorkar ban weng ïaka jingkhapngiah lane kata ka jingdheng kali kadei tang ka daw ba kim mon satia ban pynkynriah namar lehse ki seng saiñ hima ki shim kabu na ka bynta ka jing myntoi ha ka kam saiñ pyrthei. Lada ka sorkar ka thmu shisha ban pynkylluid ïa ka sor shillong bad ban weng ïa ka jingdheng kali ha kitei ki jaka pdeng jong ka iewduh kala dei ban shim wut wut ïaki sienjam ban pynkynriah mardor ïaki briew kiba sah be-aiñ ha Them Iew Mawlong ym ban ai da ki daw kiba khlem nongrim ban shu pynthame kai ïaki paidbah.
Naka liang ka seng FKJGP ka kyntu jur ïa baroh 36 ngut ki MLA jong ka Bri u Hynñiewtrep ban ïeng tylli mlon tad haduh ba katei ka jing angnud jong ki paidbah kaba pun da ki phewsnem kan urlong bad ban weng syndon ïa u shiah uba thar ïaki para doh para snam jong ka Bri u Hynñiewtrep, la pynpaw haka kyrwoh.
