Shillong, Naiwieng 04: Ki Nongtrei ka skulbah North Eastern Hills University (NEHU) hapoh ka shatri jong NEHU Non-Teaching Staff Association (NEHUNTSA) hynne ka sngi kila sdang iaka jingiakhih shong sngi (Pen Down Strike) khlem pud sngi.
Kane ka jingiakhih shong sngi jong ka (NEHUNTSA) kadei pyrshah iaka jingslem ki bor pyniaid ka NEHU ban khot thepkam Nongtrei bad ka jingslem ban kyntiew kyrdan iaki Nongtrei hapoh ka skulbah.
Haba kren shaki lad pathai khubor u president ka NEHUNTSA, u Dr WR Synrem u la iathuh ba naduh 3 tarik Naiweng 2023, ka NEHU kala dep pynmih jingpynbna paidbah ba lait kam hapoh ka skulbah hynrei mynta la shi snem, kane ka jingkhot thepkam, kam shym la poi shano shano ruh.
U Dr Synrem u la iathuh ba haka jingshisha ka National Testing Agency (NTA) kala dei ban pynlong iaka eksamin hynrei namar ka ilekshon MP, ka NTA kala phah shithi shaka NEHU ba kam lah shuh ban pynlong iaka eksamin thepkam.
U la iathuh ba ka NEHU kala dep ruh ban khot Expression of Interest (EIO) ha u bnai Nailur 2024 ban ioh Agency ban pynlong iaka eksamin.
“Hadien baka NEHU ka khlem lah shuh ban pyntyllun iaki kam haba iadei bad ka jingkhot thepkam Nongtrei (Non-Teaching), ngi la khot iaka jingialang bad ngi la shim iaka rai ban iakhih daka ba shong sngi (Pen Down Strike) khlem pud sngi tad haduh baki bod pyiaid ka NEHU ki khot iakren” la ong u Dr Synrem.
U Dr Synrem u la iathuh ba haduh mynta ki don 250 ngut ki dkhot ka NEHUNTSA hapoh NEHU Shillong bad Tura.
